Edhe një herë për kanabisin

Edhe një herë për kanabisin

Qeveria prezantoi strategjinë 3-vjeçare “…kundër Kultivimit dhe Trafikimit të Kanabisit 2017-2020” me masat, sipas saj, për parandalimin e kultivimit dhe trafikimit të kanabisit në vend, pë koordinimin e përpjekjeve të përbashkëta ndërinstitucionale për identifikimin, zbulimin dhe shkatërrimin e grupeve dhe rrjeteve kriminale që janë aktive. Nëse në vitin 2017 do të zvogëlohet shumë prodhimi ilegal i kanabisit, kjo nuk do ndodhë për shkak të luftës së qeverisë, por për interes të ekonomisë kriminale të marijuanës. Zyrtarët e shtetit dhe mafia, kanë stoqe shumë të mëdha hashashi të pashitur. Duan edhe dy vite të tjera që ta eksportojnë. Prodhimi i ri i madh vetëm do të rrezikonte këtë stok që trafikohet çdo ditë në Europë dhe poseduesit e tij. Veprimi publik më dekurajues dhe realisht efektiv për të çrrënjosur lidhjet krim-shtet do të ishte spastrimi i radhëve të Policisë së Shtetit nga zyrtarët që janë lidhur me trafikantët dhe që u krijuan atyre, në 61 bashkitë e vendit, mundësitë që të punonin të qetë, kundrejt përfitimit të 20-30 për qind të sasisë ose vlerës së kanabisit të prodhuar. Tani qeveria jonë ka një ministër të ri të brendshëm, por po ashtu, në Policinë e Shtetit, ka në postet kyç të gjithë tutorët dhe bashkëpunëtorët e mafies së kanabisit. Pa larguar këtë strukturë mafioze nga qeverisja, strategjia e re do jetë mo ta mo si ajo e vitit 2016.
Viti i shkuar ishte i begatë për mafien. Zyrtarisht u tha se gjatë vitit 2016 u sekuestruan 30 tonë kanabis, u asgjësuan rreth 2.5 milionë rrënjë bimë narkotike. Përditë po kapen trafikantë që tentojnë të nisin drejt Italisë, apo Greqisë tonelata të tëra kanabis, edhe pse kryeministri na garantoi se qeveria asgjësoi mbi 98 për qind të sipërfaqes së mbjellë. Sot flitet për bashkëpunim ndërinstitucional, por askush nuk e pengonte qeverinë një vit më parë që të përdorte burimet njerëzore dhe inteligjente të agjencive ligjzbatuese, ndërkohë që Policia e Shtetit u bë tagrambledhësja e këtij biznesi kriminal.
Qeveria, pas shkatërrimit të Lazaratit, gati 3 vite më parë, ende nuk ka një strategji se si të ringjallë bujqësinë, si t’i ndihmojë fermerët që ata të mos kërkojnë mbijetesën duke punuar si argatë te plantacionet e kanabisit për 2-3 mijë lekë në ditë.
Në nëntor 2014, kërkova që bujqësia të subvencionohet me të paktën 150 milionë dollarë në vit. Qeveria ka ndarë vetëm “thërrime” buxhetore për këtë sektor jetik të ekonomisë sonë kombëtare. Kryeministri ynë ka thënë se është e parakohshme ideja ime për të ngritur ekonominë kombëtare të kanabisit, si monopol shtetëror, që do të sjellë të ardhura të mëdha për buxhetin dhe për fermerët e licensuar. Ajo, vit pas viti, ka injoruar tendencën botërore për ta kthyer këtë bimë magjike në fitimprurëse dhe për t’ia hequr mafies nga duart. Ndërkohë që qeveria jonë përgatiste këtë strategji që nuk ndryshon aspak nga ajo e viteve 2012-2016 që kishte Berisha, si protektor politik i Lazaratit, një vend gjigand me ekonomi super të zhvilluar si Kanadaja, vensdosi këto ditë që t’i bashkohet hartës botërore të legalizimit të kanabisit farmaceutik dhe atij rekreativ, ku bëjnë pjesë dhjetra vende, duke përfshirë edhe të rajonit tonë. Nën shembullin e SHBA-ve, qeveria liberale e Kanadasë do ta bëjë legal kanabisin farmaceutik dhe atë rekreativ prej korrikut 2018. Burrat dhe gratë me mend të qeverisë kanadeze hartuan një dokument 106 faqësh dhjetorin e shkuar për legalizimin e marijuanës për ta kthyer edhe atë në ekonomi kombëtare dhe në dobi të qytetarëve.

0
Kokëdhima: Marrëveshja për Metën president, 4 vite më parë

Kokëdhima: Marrëveshja për Metën president, 4 vite më parë

Themeluesi dhe drejtuesi i lëvizjes ZGJIDHJA, Koço Kokëdhima i ka uruar suksese Ilir Metës në detyrën e re si president i vendit. Kokëdhima zbulon se lëvizja e kreut të LSI­-së drejt presidencës nuk është e papritur pasi ishte parashikuar në marrëveshjen e katër viteve më parë PS-­LSI.

“Urim për Presidentin Meta!

Sot Ilir Meta u zgjodh President i vendit.
Kjo ishte parashikuar në marrëveshjen PS-LSI të katër viteve më parë. Unë i uroj suksese zotit Meta në këtë detyrë të lartë dhe në sfidën e tij për të qenë një figurë dhe simbol i bashkimit kombëtar.
Ilir Meta dhe LSI janë aq të lidhura me njëra-tjetrën. Opinioni publik pret të mësojë se çfarë roli do të luajë zoti Meta dhe LSI tani për tejkalimin e krizës politike. A do mundet Presidenti i ri të ndihmojë që populli ynë të shkojë i bashkuar në zgjedhjet e sivjetshme?
Nëse shqiptarët do të përçahen në zgjedhje, Meta do të ketë një presidencë të vështirë. Unë uroj që zgjedhja e tij t’i shërbejë ç’tensionimit të situatës dhe bashkimit të popullit në zgjedhjet e përgjithshme”, tha Kokëdhima.

0
ZGJIDHJA që shqiptarët të rifitojnë atë pushtet të shpërdoruar nga kryetari i partisë

ZGJIDHJA që shqiptarët të rifitojnë atë pushtet të shpërdoruar nga kryetari i partisë

Pas vitit 2013 për Shqipërinë ndryshuan ngjyrat, por jo metodat e qeverisjes dhe fryma demokratike që do të sillte rilindjen e shumëpritur. Partia Socialiste në 2013 ngriti një kauzë të madhe mbi ndryshimin e vendit dhe e quajti atë RILINDJE. Kjo fjalë ju dha njerëzve shpresën që ju mungonte, ju dha besimin se Shqipëria do të ndryshojë, por sot katër vjet më pas kjo shpresë po venitet. Rilindja erdhi vetëm për pushtetin personal të kryetarit, por nuk solli rritjen të konsiderueshme të mirëqenies së shqiptarëve.
E harroi kryetari i partisë kauzën e socialistëve që e sollën në pushtet dhe rendi pas vetëkënaqësisë këto katër vjet. Gjen kohën për të përcaktuar detaje dhe ngjyra projektesh, por nuk ka kohë të japë zgjidhje për njerëzit e varfër. Qeverisja socialiste e pjellë nga Partia Socialiste nuk e përfaqëson atë denjësisht as në përmbajtje e as në politika. Nuk mundet kurrë drejtuesi i një Partie Socialiste të harrojë shtresat në nevojë që e mbështesin duke rendur pas kënaqjes së manjatëve të ndërtimit apo industrisë e tregtisë të cilët falë lidhjeve me pushtetin pasurohen dhe më shumë. Sot në Shqipëri shtresa e varfër rritet dita-ditës, shtresa e mesme po shkon drejt zhdukjes dhe ngelen po ata njerëz të pasur që pasurohen në çdo sistem falë lidhjes që kanë me kastat në pushtet. E gjithë kjo situatë vjen sepse modeli i lidershipit që kemi qysh prej 25 vitesh është shumë i gabuar. U kemi besuar boll kryetarëve dhe kryeministrave ka ardhur koha që të ngremë sisteme ligjore bazuar mbi të drejtat kushtetuese, të cilat zhbëjnë forcën e kryetarëve përballë antarësisë dhe qytetarëve. Shqipëria nuk mund të tërhiqet zvarrë nga njerëz të dështuar dhe të babëzitur, të cilët nuk ngopen kurrë dhe qëndrojnë në pushtet falë totalitarizmit dhe nevojave e shpresës së njerëzve të varfër të cilët pranojnë që të shtypen vetëm se u premtohet një vend pune apo shantazhohen me të. E vetmja zgjidhje për të shembur pushtetin absolut të kryetarit janë zgjedhjet paraprake në parti. Ato bëjnë që konkurrenca në parti të rritet dhe konkurrenca e ndershme sjell rritje të cilësisë së kandidatëve dhe tërheqjen e individëve me vlera në parti. Me zgjedhjet paraprake i jepet e drejta anëtarësisë që të mënjanojë modelet e dështuara të lidershipit dhe jo t’i riciklojë ato për shkak të lidhjeve me kryetarin. Me zgjedhjet paraprake shmangim rritjen e princave kombëtarë apo lokalë si të përzgjedhur të kryetarit për fronin sepse me anë të primareve kandidatët dalin nga mbështetja reale që kanë në anëtarësi dhe jo nga mbështetja përkëdhelëse e kryetarit. Ky sistem aktual vret shpresën apo dëshirën e çdo njeriu që ka aftësitë, eksperiencën dhe formimin e duhur për të qenë një lider duke e larguar nga Partia Socialiste.
Nga ana tjetër fillon të rrisë një brez servilësh, të cilët nuk e shikojnë të nevojshme që të kenë aftësi të veçanta për drejtim përveç SERVILOSJES ndaj kryetarit dhe INTRIGAVE ndaj më të zotëve se ta. Zgjidhja është e vetmja lëvizje serioze e ngritur nga njerëz të cilët nuk kanë negociuar asnjë nga parimet e tyre për hir të interesave të vogla.
Pas të gjitha takimeve të deritanishme të ZGJIDHJES socialistët kanë filluar të organizohen për të marrë mbrapsht atë pushtet që ju takon dhe është shpërdoruar deri tani nga kryetari. Ata po organizohen mbi bazë qendre votimi, mbi bazë territori, lagjeje, qyteti apo fshati, mbi bazën e grupeve të interesit, mbi qendra prodhimi e edukimi dhe lirisht mbi bazë njohjesh. Në nivel bashkie po ngrihen këshillat e anëtarëve të cilët do të koordinojnë forumet bazë. Në ditët në vazhdim do të ngrihen dhe forumet e tjera në bazë rajoni dhe në rang kombëtar. Të gjitha forumet kryesore po ngrihen në bazë të parimeve demokratike të përfaqësimit dhe të gjithëpërfshirjes. I gjithë ky ortek do të jetë i papërmbajtshëm në qoftë se do të përballet me kokëfortësinë dhe arrogancën e kryesisë për të mos vlerësuar mendimin dhe nevojat e socialistëve të bazës. Të gjithë bashke do t’i themi ndal këtij modeli drejtimi dhe do të shndërrojmë Partinë Socialiste në forcën që do të nxjerrë nga gjiri i saj burrat dhe gratë, të rinjtë dhe të rejat që do të ndryshojnë përfundimisht Shqipërinë.
*Autori është anëtar i Asamblesë Kombëtare të PS-së. Fjala gjatë bashkëbisedimit të drejtuesit të lëvizjes “Zgjidhja”, Koço Kokëdhima, me socialistët e Shkodrës/Ted Nasto
0
Intervista Z.Koco Kokëdhima në televizionin “Star Plus” në Shkodër me gazetarin Erzen Koperaj

Intervista Z.Koco Kokëdhima në televizionin “Star Plus” në Shkodër me gazetarin Erzen Koperaj

Z. Kokëdhima në këtë situatë ku duket se ngërçi ka përfshirë jo vetëm politikën, por edhe shoqërinë shqiptare, ju vini me formulën e ZGJIDHJES. Si ka lindur kjo lëvizje dhe cilat janë idetë në të cilat bazohet?
Kokëdhima: Ka një fakt të thjeshtë që të gjithë shqiptarët e dinë: tranzicioni ynë është më i vështiri, më i zgjaturi dhe më zhgënjyesi ndër tranzicionet që kanë bërë vendet që kanë dalë reegjimet diktatoriale dhe komuniste, siç doli vendi ynë. Po të kemi parasysh se si filloi demokracia në vitet ’90-’91 me ato parullat dhe aspiratat e asaj kohe “E duam Shqipërsinë si gjithë Europa”, të gjithë aspironin një vend të lirë, demokratik, sovran, me liri të konkurrencës dhe të sipërmarrjes, donin një vend të meritës, një vend ku njerëzve do t’u jepej mundësia dhe shansi për të realizuar ëndrrat e jetës së tyre, atëherë e kuptojmë shumë mirë se pse është aq i madh zhgënjimi i njerëzve tani pas 26 vitesh, kur Shqipëria mbetet vendi më i varfër në Evropë, i prapambetur dhe shumë i korruptuar. Tani, padyshim, që njerëzit e logjikshëm duhet të shtrojnë një pyetje: “Pse ndodh kështu me ne?”. Vende të korruptuara ka plot. Edhe Mali i Zi ka korrupsion, edhe Maqedonia, edhe në vendet e rajonit, edhe në Evropë ka korrupsion, edhe në Amerikë ka korruspion, por të gjitha këto vende shkojnë përpara. Ndërsa ne nuk shkojmë dot përpara. Nuk mjafton të themi se këtu ka korrupsion, prandaj nuk ecim dot përpara. Jo. Këtu ka plagë më të thella dhe më të rënda. ZGJIDHJA ka ardhur pikërisht si një nevojë e njerëzve të thjeshtë të Shqipërisë, për të kuruar plagë të rënda të sistemit që kompromentojnë nevojat dhe dëshirat e popullit tonë. Në qoftë se Shqipëria nuk bën përpara, nuk pasurohet nga viti në vit, nuk u jep shanse njerëzve, në qoftë se në Shqipëri populli është i parespektuar, është i padëgjuar, është i shkelur, është i dhunuar, është një popull i nënvlerësuar nga qeveritë e tij dhe kjo ndodh për arsyen e thjeshtë se në Shqipëri është i kalbur sistemi. Në Shqipëri kemi dy probleme të rënda: Shqipëria nuk bën zgjedhje të lira dhe të ndershme dhe në Shqipëri roli i popullit është zeruar. Pra në qoftë se sistemi që ne kemi ndërtuar nënkupton që populli luan një rol të madh në funksionimin e sistemit përmes votës së tij, kjo nuk ndodh në Shqipëri. Populli shqiptar është një popull i zhveshur nga të drejtat e tij. Populli ynë nuk voton dot në referendume, nuk voton dot ligje, nuk voton dot përfaqësues, nuk voton dot kandidatët për deputetë, kandidatët për kryetarë bashkie, kandidatët për këshilltarë bashkie, kandidatët për president, apo kandidatët për kryeministër. Të gjitha këto i vendosin kryetarët, populli voton. Kryetarët e partive zgjedhin. Edhe kryetarët e bashkive të Shkodrës, nuk i zgjedh populli i Shkodrës, i vënë kryetarët nga Tirana. Dhe populli duhet të votojë o njërin, o tjetrin. Pa zgjidhur këto dy kolona të sistemit demokratik, nuk do fillojë të ecë mbarë Shqipëria. Partitë politike sot janë banda, nuk qeverisin me rregulla, me kulturë funksionale, me institucione, nuk kanë demokraci të brendshme, nuk kanë ekspertizë, nuk zgjidhen sipas parimit nga poshtë lart. Prandaj ne duam që në Shqipëri të kurohen plagët e rënda të sistemit. Dhe me kurimin e plagëve të rënda të sistemit, të marrë fund tranzicioni i Shqipërisë dhe të marrë rrugë e ardhmja dhe e tashmja e popullit dhe e rinisë sonë, që të kemi zhvillim dhe pasurim çdo vit.
Me këto që sapo thatë duket sikur jeni të paktën në një kauzë me protestën e opozitës.
Kokëdhima: Për çfarë?
Përsa i takon kërkesës, themeli i ndryshimit janë zgjedhje të lira dhe të ndershme.
Kokëdhima: Që të jem shumë korrekt, protesta e opozitës, e kam theksuar në të gjitha fjalimet e mia, është paqësore. Dhe çdo protestë paqësore është e mirëpritur, nuk ka asgjë për t’u sharë, nuk ka asgjë për t’u kritikuar. E vërteta historike është se kulturën e vjedhjes së zgjedhjeve në Shqipëri e mbolli Partia Demokratike dhe Berisha. Ato vodhën zgjedhjet e pjesshme vendore në vitin 1994 dhe zgjedhjet e përgjithshme në vitin 1996. Dhe u mboll kultura e vjedhjes së zgjedhjeve në Shqipëri. E majta nuk u distancua nga kjo kulturë, por iu bashkua kësaj kulture. Të dy palët vjedhin zgjedhjet në Shqipëri. Të dy palët blejnë, vjedhin, trafikojnë votat. Prandaj Shqipëria nuk bën dot zgjedhje të lira e të ndershme. Sigurisht që unë kam pritur dhe e kam thënë disa herë që pres që zoti Basha të kërkojë falje në emër të Partisë Demokratike për krimet elektorale që ka bërë PD-ja në të shkuarën dhe të japë garanci që të distancohet përfundimisht nga këto lloj krimesh, me të cilat pastaj është e implikuar edhe e majta. E vërteta tjetër gjithashtu është që qeveria jonë nuk punoi për të instaluar institucionin e zgjedhjeve të lira dhe të ndershme në Shqipëri. Ka dy atu të forta që qeveria jonë ja ka dhënë opozitës: E para është që në këto 4 vjet s’bëri asgjë për ta reformuar sistemin zgjedhor dhe për t’i pastruar përfundimisht zgjedhjet. Dhe e dyta lejoi ekonominë kriminale të kanabisit, në të cilën janë implikuar edhe shumë zyrtarë të Policisë së Shtetit, që të lulëzojë në këtë farë feje dhe të grumbullojë një fuqi të tillë financiare, me të cilën padyshim mund të afektojë zgjedhjet, mund të afektojë gjitha institucionet kushtetuese, parlamentin, qeverinë, mediat, drejtësinë dhe institucionet e tjera dhe të kthehet në një rrezik real për blerjen e zgjedhjeve dhe për molepsjen dhe manipulimin e tyre. Kështu që këto dy atu, e justifikojnë opozitën në atë që bën, jo historia e shkuar, e rolit që ka luajtur Partia Demokratike në institucionin e zgjedhjeve dhe zgjedhjet në Shqipëri, në përgjithësi.
Duke kaluar te ZGJIDHJA që është një lëvizje politike brenda Partisë Socialiste. A tenton kjo lëvizje të kalojë si një forcë politike më vete, duke parë edhe situatën më të fundit?
Kokëdhima: ZGJIDHJA sot është e fokusuar në demokratizimin e partive politike, në evidentimin dhe reformimin e sistemit politik në Shqipëri. Në qoftë se flasim për zgjedhje të lira dhe të ndershme, duhet t’ju them se ZGJIDHJA e ka bërë kauzë të vetën, që në ditën e parë të saj, çështjen e zgjedhjeve të lira e të ndershme. Po qe se qeveria socialiste do të kishte dëgjuar ne për çështjen zgjedhjeve, nuk do të kishte lejuar që të vinte puna në këtë krizë që ka ardhur sot dhe kur vendi rrezikon të bjerë në kaos dhe në konfrontime e në sprirale të dhunës e konflikteve. Po të na kishte dëgjuar ne qeveria, do të kishte marrë masat për të zbatuar një strategji komplekse që nuk do të lejonte që Shqipëria të kthehej në një parajsë për mafien e marijuanës. Nuk do të lejonte që marijuana të bëhej miniera e arit e kësaj mafie, por do të ndërtonte një ekonomi legale nën kontrollin e rreptë të shtetit. Një monopol shtetëror, një ekonomi që do të ishte në të mirën e popullit dhe jo në të mirën e mafies. Dhe do ta zhdukte mafien e marijuanës nga Shqipëria. Po të na dëgjonte ne qeveria, do të kishte zgjedhur reformën zgjedhore dhe nuk do i kishte dhënë shanse opozitës. Ne e kemi dhënë formulën tonë për zgjedhjet që në mesin e vitit të kaluar, kur kemi kërkuar votim elektronik në qendrat e votimit, numërim elektronik dhe një administratë zgjedhore jopartiake. Mjaft më me komisionerët e partive. Mjaft më që ata të ngarkuarit e dy partive të mëdha, që shqyejnë votat atje në komisionet zgjedhore të partive të vogla dhe të individëve të pavarur. Nuk mundet që dy parti të numërojnë votat e të gjitha partive të tjera. Duhet që një komision shtetëror të përgjigjet për një aministratë shtetërore, të përgjigjet për votimet. Në këtë mënyrë, siç flasim për këtë gjë, ZGJIDHJA ka propozime, projekte, idera, platforma shumë racionale për çdo çështje. Jo që nuk e pranon manipulimin e popullit, por pranon që t’i flasim hapur popullit. Nuk e pranon ZGJIDHJA që t’i fshehim të vërtetat, por t’i përballojmë të vërtetat. Nuk mund të hiqemi si zotër në këtë vend.
Politikanët janë përfaqësues të njerëzve të thjeshtë dhe duhet të përfaqësojnë njerëzit e thjeshtë, duhet t’u shërbejnë dhe duhet t’u japin zgjidhje njerëzve të thjeshtë. ZGJIDHJA është një platformë demokratike që synon të ndihmojë qytetarët e Shqipërisë që të marrin pjesë në qeverisjen e punëve dhe të marrin në duar fatin e tyre, fatin e vendit dhe fatin e popullit. Nuk mund ta rregullojë Zoti punën e Shqipërisë dhe punët e Shqipërisë nuk mund t’i rregullojë as Zoti dhe as kryetarët e partive që janë bërë si zotër në Shqipëri dhe që e konsiderojnë Shqipërinë çifligun e tyre dhe partitë i konsiderojnë si sh.p.k.-të e tyre. Partitë politike janë platforma të popullit, të qytetarëve, që t’u mundësojnë qytetarëve të marrin në duar fatet e veta dhe të përfshihen në mirëqeverisjen e vendit.
Një prej ideve më të rëndësishme që shihet te platforma e ZGJIDHJES është ajo e primareve, pra që baza të zgjedhë të gjitha rangjet e përfaqësimit, qoftë lokal, qoftë edhe qendror.
Kokëdhima: S’ka nevojë që të bëjmë shpikje ne. Shkodra është një vend që ka gjithë këtë emigracion. Edhe nga Malësitë e Shkodrës ka shumë djem e vajza, gati çdo familje, çdo fis ka djem e vajza që jetojnë dhe punojnë në Londër, në Angli, në Francë, në Amerikë, në Kanada, në vendet e zhvilluara të Perëndimit. Nuk kanë nevojë që të besojnë në ZGJIDHJEN shkodranët, siç thotë ZGJIDHJA për këtë çështje që ngrini ju. Le të pyesim nipërit, mbesat, djemtë, vajzat, kushërinjtë, fqinjtë e tyre. T’i pyesin në Europë “si bëhen zgjedhjet në Angli, si bëhen zgjedhjet në Amerikë?”. Po t’i emëronin kryetarët e partisë kandidatët për zgjedhje, do të zgjidhej Trump president i Amerikës? Kurrë nuk do të ndodhte, por nuk është kështu në asnjë vend të zhvilluar perëndimor. Në qoftë se do të zgjidhesh president, Partia Socialiste, për shembull, duhej të bënte primaret për presidentin. Pra të konkurronin kanditatët, të zgjidhej ai që del nga Partia Socialiste siç do të dalë kandidati nga Partia Demokratike, siç do të dalë kandidati nga një parti tjetër dhe pastaj është tjetër gjë formula se si do luhet. Por s’mund të jenë këto as-ët nën mëngë, lojtarët dhe atutë e kryetarëve të partive. Sepse kryetarët e partive s’janë pronarë të Shqipërisë. Si zgjidhen deputetët në Shqipëri? Këtu ka deputetë shumë të mire. Unë njoh nga Shkodra deputetë shumë të mirë, siç njoh edhe deputetë të cilët nuk vlejnë asnjë lek për qytetarët, siç ndodh në të gjithë Shqipërinë. Çfarë ndodh me një deputet që diskreditohet, për shembull, në Vlorë? Po qe se e do kryetari, zgjedhjet e tjera e çon në Lezhë ai. Kur diskreditohet në Lezhë e ço në Dibër, s’e ka problem. Dhe mund të të urrejë populli dhe t’i mund të jesh prapë deputet, sepse popullin nuk e pyet njeri. Deputetët duhet t’i zgjedhin njerëzit, qytetarët përmes primareve mikse, përmes zgjedhjeve paraprake dhe të mos vendosë kryetari i partisë kandidatët. Kushdo që e ndjen veten të aftë, çdo qytetar që dëshiron të konkurojë për t’u bërë deputet, për t’u bërë kryetar bashkie, për t’u bërë gjithçka në këtë vend, duhet të ketë liri të konkurrojë pavarësisht nëse e do, e pëlqen ose jo kryetari i partisë. Duhet të konkurojë dhe populli po t’i japë votën, ai duhet të bëhet edhe deputet, edhe kryetar partie, edhe president, edhe kryetar bashkie, edhe këshilltar bashkie e kështu me radhë.
Megjithatë a mendoni se është një realitet shumë i vështirë për t’u ndryshuar, duke patur parasysh edhe vetë figurën tuaj, pavarësisht se në Kongresin e Partisë Socialiste kërkuat që të votoheshit, e votëbesuat veten dhe në përfundim në një lloj mënyre ju u përjashtuat?
Kokëdhima: E kam shpjeguar këtë, që ka dy Parti Socialiste, ka edhe dy Parti Demokratike, nuk kemi nga një. Nuk po shkoj më tutje sepse keto janë partitë kryesore. Kemi partinë e bazës dhe kemi edhe partinë e udhëheqjes. Këto janë dy parti të ndara, të shkëputura. Këto takohen vetëm në zgjedhje, pastaj partia e udhëheqjes ja bën me hile kësaj partisë së bazës. Nuk i hap telefonin pastaj, nuk e dëgjon, nuk e respekton, e gënjen, e mashtron dhe e vjedh. Mua nuk më ka përjashtuar partia e socialistëve të thjeshtë të Shqipërisë. Ndihem shumë pranë socialistëve të thjeshtë, nuk e kam fare problem se si reagon lidershipi. Çfarë i kërkoj unë udhëheqjes së Partisë Socialiste dhe udhëheqjes së partive të tjera? S’ju kërkoj asgjë për veten time. Ju kërkoj të demokratizojnë partitë. Në qoftë se një parti nuk qeveriset në mënyrë demokratike, si do prodhojë qeverisje demokratike? S’mund të prodhojë. Si mund të prodhojë institucione shtetërore demokratike? S’mund të prodhojë. Edhe kjo është shumë thelbësore. Po qe se në vendimmarrjen e partive politike do të luaj rol anëtarësia e thjeshtë e partive, atëherë do të sillen ndryshe me popullin që të gjithë, edhe qeveria, edhe parlamenti, edhe drejtësia e institucionet e tjera. Të gjithë do të silleshin krejtësisht ndryshe me popullin, në çastin që do të njihen të drejtat e mohuara të popullit tonë, të drejtat e tij për të zgjedhur dhe për t’u zgjedhur lirisht në institucionet e larta politike të vendit, të drejtat e tij për të imponuar vullnetin e vet në mënyrë të drejtpërdrejtë në votë për të gjitha çështjet me rëndësi në Shqipëri.
A është ZGJIDHJA vetëm pjesë e Partisë Socialiste, pra që bazohet tek anëtarësia e Partisë Socialiste?
Kokëdhima: Në fakt e kam theksuar edhe unë, dhe e kam vënë re edhe unë këtë fakt që kudo sallat e takimeve që bëj unë, janë plot dhe njerëzit kanë interes. Janë takime shumë interesante dhe kjo lidhet, mendoj unë, me faktin që ne artikulojmë me vërtetësi plagët e shoqërisë sonë, problemet që kanë njerëzit tanë, njerëzit e thjeshtë. Edhe prandaj idetë e ZGJIDHJES pëlqehen nga njerëzit, veçanërisht nga rinia. Përkrahen nga njerëzit edhe padyshim që janë ide që do të përqafohen gjërësisht. Ne e kemi përcaktuar ZGJIDJEN si korent në Partinë Socialiste. Ka filluar si korent jo për të mbetur vetëm në kuadër të anëtarësimeve nga Partia Socialiste. Ka mbetur si korent në kuptimin që ne nuk kishim për qëllim që të bënim një parti të re, por kishim për qëllim që të bënim një platformë, një lëvizje politike që emancipon si Partinë Socialiste dhe partitë e tjera politike në Shqipëri. Një platformë që i jep mundësi, një përpjekje e organizuar e popullit tonë për të ndryshuar situatën, sistemin poltik dhe situatën e vendit. Ne anëtarësojmë edhe njerëz nga jashtë Partisë Socialiste, sepse ky vullnet i popullit nuk imponohet duke iu lutur padronëve të Shqipërisë, nuk imponohet as duke iu qarë kryetarëve. U imponohet me votën dhe vullnetin e gjithë popullit tonë. Nga kjo pikëpamje ne jemi të hapur që të pajtojmë njerëz pas asnjë lloj paragjykimi politik. Njerëz që thjeshtë i pranojnë tezat e kësaj lëvizje, pranojnë nevojat e popullit tonë, pranojnë çështjet e drejta që ne duhet t’i marrim përsipër që t’i zgjidhim me përparësëi, dhe jo duke iu nënshtruar interesave të vogla partiake, të sakrifikojmë interesat e mëdha të vendit dhe të njerëzve tanë. Çdo qytetar është i mirëpritur, por unë besoj që rolin më të madh te ZGJIDHJA do ta luajë rinia. E gjithë rinia. Ajo rini që s’ka sot shpresa, që s’ka sot mundësi. Ajo rini që sot detyrohet ta lërë vendin, ta lërë atdheun, ta braktisë shtëpinë e babës dhe të nënës dhe të ikë në emigracion. Ata të rinj e të reja që shkollohen e mësojnë në universitetet e në shkollat tona këtu, ajo rini që është e punësuar këtu dhe që do një realitet tjetër. Ajo rini që e kupton se merita këtu nuk respektohet, që këtu bëjnë progres vetëm servilët e kryetarëve, partive, por nuk bën dot progres dhe nuk respektohet i zoti. Ku në krye të punëve në institucione e kudo nuk vihen njerëzit më të aftë dhe të rinjtë që kanë studiuar më shumë, që kanë më shumë talent, që kanë më shumë energji brenda vetes, por vihen servilët dhe shërbëtorët e pushtetit të kryetarëve dhe të klaneve të vogla partiake. Kjo rini mendoj se do të jetë një energji shumë e madhe, edhe për të arritur ZGJIDHJEN si lëvizje politike dhe për të imponuar dëshirat e popullit tonë dhe modernizimin dhe reformimin e sistemit politik në Shqipëri.
Z. Kokëdhima, ju keni thënë që nga mesi i muajit prill do të bëni përmes votimit elektronik zgjedhjen e kandidatëve në disa qarqe të vendit. Përveç kësaj ju keni thënë se këto do të jenë ofertë për Partinë Socialiste. A mendoni se do të ketë një tkurrje të njerëzve tuaj nga një veprim i tillë? Apo është një demostrim force përballë PS-së?
Kokëdhima: Unë nuk mendoj asnjëherë gjëra të këtij tipi, për të demonstruar forcën përballë këtij apo përballë atij.
Dashje pa dashje është një tregim forcë jo vetëm për Partinë Socialiste, por edhe për enturazhin e ndërkombëtarëve, të cilët thonë se zgjedhjet me votim elektronik nuk mund të bëhen në Shqipëri.
Kokëdhima: Primaret që ne duam të bëjmë brenda lëvizjes ZGJIDHJA, bëhen sipas modelit që në duam të sundojë në Shqipëri. Pra bëhet përmes zgjedhjeve paraprake, ku mund të votojnë të gjithë njerëzit që vijnë dhe regjistrohen për kandidatët që dëshirojnë. Këtë kulturë ne duam që ta mbjellim si model ligjor dhe sundues në Shqipëri. Pra që çdo përfaqësues në Shqipëri, duhet të zgjidhet përmes primareve. Duhet të mbyllet epoka kur komandohen nga lart, emërohen përfaqësuesit e popullit. Populli duhet t’i zgjedhë lirisht përfaqësuesit e vet. Dhe ne këtë model do të promovojmë. Ne kandidatët për deputet do t’i zgjedhim me primare. Ai që merr vota më shumë, ai do të jetë në vend të parë. Ai që merr vota më pak, ai do të jetë në vendin që meriton. E kështu vetë qytetarët e bëjnë listën. Ky është modeli që nuk e bën kryetari listën andej nga Tirana, se kush do të jetë deputet në Shkodër, por e bëjnë vetë qytetarët e Shkodrës së kë duan deputet. Edhe kjo ka rëndësi emancipuese, është një lëvizje në vetvete që e promovon kulturën e re që në duam të funksionojë si standard në politikën e Shqipërisë. Së dyti, sigurisht që unë nuk mund të predikoj se cila do të jetë e ardhmja e ZGJIDHJES, sepse, përderisa unë e iniciova ngritjen e saj, tani ZGJIDHJA nuk jam unë. “ZGJIDHJA jam unë” është parullë e të gjithëve, në kuptimin e rolit që duhet të luajë çdo individ në Shqipëri. Çdo qytetar ka një rol të madh. E ardhmja e ZGJIDHJES është një çështje që do ta vendosë anëtarësia e saj, se si do të shkojë dhe se si do të evoluojë. Por thelbësore është që ne nuk duam që ta konkurrojmë sot Partinë Socialiste, as ta përçajmë dhe as ta zvogëlojmë atë. Ne nuk e mohojmë që jemi të majtë, por nuk jemi të majtë që duam të vjedhim vota për të majtën. Jemi të majtë që besojmë se fiton, kur fiton vullneti i popullit, pavarësisht se kush është emri i fituesit ose i partisë fituese. Po fitoi vullneti i popullit, kemi fituar të gjithë. Po fitoi një parti jashtë vullnetit të popullit, kemi humbur të gjithë dhe përfitojnë vetëm pesë njerëz, pesë uzurpatorë atje në krye dhe një grusht biznesesh të lidhur me ta. Ne jemi nga ata lloj të majtësh që duam zgjedhje të lira, që duam që populli të ketë në duart e tij fatin e vet, dhe jo ta varë fatin në duart e tre-katër njerëzve. Që këtë vend mos ta qeverisin 3-4 njerëz, por ta qeverisin të gjithë votuesit dhe qytetarët e Shqipërisë, në një kuptim të funksionimit të demokracisë siç funksionon në të gjitha vendet e tjera Perëndimore. Unë e kam ftuar edhe sot Partinë Socialiste, më saktë lidershipin e Partinë Socialiste, që të hapet partia, që të demokratizohet, të pranohet mendimi ndryshe, të pranohet ZGJIDHJA, të bisedohet me të dhe me të gjithë fraksionet. Të lejojnë që njerëzit të shprehen lirshëm në parti, të thonë pikëpamjet e tyre. E të gjithë së bashku të bëjmë ato strategji që i duhen popullit dhe vendit tonë. Kështu që pranon Partia Socialiste apo refuzon, kjo është një çështje që nuk mund ta paragjykoj. Kur të ndodhin gjërat do të kemi përgjigje për gjithçka.
Duke u nisur prej datës 15 prill, a mendoni se pikërisht njerëzit që lëvizja juaj ka zgjedhur mund të jenë nën presionin e hakmarrjes politike të pushtetit? Sepse ndodh vazhdimisht, është një realitet që nuk mund ta fshehim.
Kokëdhima: Për fat të keq, reagimi i lidershipit të Partisë Socialiste ka qenë represiv ndaj gjithë atyre djemve dhe vajzave që kanë përkrahur idetë e ZGJIDHJES dhe nevojën e reformimit të Partisë Socialiste, të partive politike dhe të sistemit politik në Shqipëri. Është operuar me represion, me shantazhe, me presione dhe me pushime nga puna. Sigurisht që për njerëzit e ndriçuar kjo nuk është një formë e mirë reagimi, sepse nuk mund të burgosen idetë në botën e internetit, në botën e rrjeteve sociale siç është sot. Nuk mund të nënshtrohen njerëzit e vetëdijshëm se i pushon nga puna, sepse njerëzit e vetëdijshëm janë edhe njerëz të zotë. Njerëzit e zotë nuk e perceptojnë si hata të madhe se i pushove nga puna. Sigurisht që ata nuk pajtohen me forma të tilla dhe ne do t’i dënojmë të gjitha ndëshkimet, pushimet politike nga puna. Ato janë një kulturë primitive, e tejkaluar dhe shumë e keqe. Mua më krijojnë një ndjesi shumë të keqe këto lloj veprimesh. Duhet të hiqet dorë padyshim nga këto. Duhet që lirisht vendi ynë të diskutojë idetë e njerëzve dhe asnjë person nuk duhet të ndëshkohet për shkak të ideve që ka. Kemi vuajtur boll me regjimet e shkuara dhe në diktaturë nga mungesa e lirisë së mendimit, e lirive njerëzore, e lirisë së shprehjes, e lirisë së fjalës, e lirisë së opinioneve. Sot duhet ta përjetojmë këtë liri. Është turp për njerëzit që vijnë tani në 2017-n në pushtet dhe mendojnë se si t’u mbyllin gojën njerëzve me metoda të tilla. Nuk do të japë rezultat kjo gjë. Sa më shumë goditen veprimtarët e lëvizjes sonë, aq më shumë ne shtohemi. Sa më shumë forcohet represioni, aq më shumë rritemi dhe kështu do të ndodhë edhe më tej. Ne synojmë të bëjmë një lëvizje popullore, një lëvizje që t’i ndodhemi afër çdo njeriu, që të kërkojmë të dëgjohet zëri i çdo njeriu. Çdo qytetar shqiptar ka diçka me rëndësi për të thënë për veten, për familjen, për fisin, për shoqërinë, për fshatin, për lagjen, për qytetin, për krahinën, për qarkun, për popullin dhe atdheun e vet. Ai zë duhet dëgjuar, sepse është shumë i rëndësishëm. Nuk është një numër, është një njeri. Nuk është një numër, është një krijesë e rëndësishme. Çdo njeri dhe gjithë njerëzit e këtij vendi meritojnë respekt të thellë, veçanërisht nga politikanët, përfaqësuesit dhe njerëzit e pushtetit. Nuk do të thyhet, nuk do të mposhtet, nuk do të dekurajohet ZGJIDHJA nga represioni. Është kohë e humbur. Është betejë e humbur kjo lloj mënyre dhe qasje që bën pushteti ndaj lëvizjeve të reja politike. Më thoni ju a ka ndonjë qytetar të Shkodrës që thotë që dua të mi vendosë deputetët Edi Rama dhe nuk dua t’i zgjedh unë? A ka ndonjë qytetar të Shkodrës që thotë që dua që deputetët të mos i vërë populli i Shkodrës, por Saliu apo Basha, apo kush të doni juve? S’ka. Po t’i pyesim socialistët e Shkodrës t’u themi kush doni ju t’i zgjedhë këshilltarët e bashkisë, doni t’i zgjedhë kryesia e Partisë Socialiste në Tiranë apo populli i lagjeve këtu? Do të thonë populli i lagjeve, këtë që kërkoj unë. Çfarë do të thonë njerëzit këtu, se kandidatin për kryetar bashkie duhet ta vendosin ata në Tiranë, apo të thonë që me primaret duhet të zgjidhen këtu nga populli. Gjithë kandidatët, djemtë dhe vajzat më të mirë të qytetit të konkurrojnë me njëri-tjetrin, 10, 20, 30 vetë dhe pastaj, përmes zgjedhjeve paraprake, të dalin dy figurat që kanë mbështetjen më të madhe. Si mendoni ju, ky populli këtu është me idetë që them unë apo me idetë e tjera? Është me këto që them unë, pa u përgjigjur ju. Ju po doni mund të më kundërshtoni, por ata që po na dëgjojnë atje e dinë se kush është e vërteta. Më thoni, si mendoni ju?
Normalisht, parimisht jam dakord me ju ashtu si pothuajse të gjithë qytetarët e Shqipërisë.
Kokëdhima: Ja pse nuk ecën represioni mbi këto ide, kur këtu kemi një organizim, kur këtu kemi një platformë, një strukturë, kur kemi një lëvizje, këtu kemi gjithë këta njerëz të ndriçuar që duan ta çojnë përpara këtë çështje. Kemi edhe dëshirën dhe vullnetin e popullit e nuk do ta ndalë asgjë tjetër këtë. Sa më lart shkojnë me metodat e represionit, të shantazhit të pushimeve nga puna, aq më shumë do të deskreteitohen në këtë rrugë njerëzit e pushtetit, qofshin këta të majtë, qofshin të djathtë, qofshin me ngjyrë dhe pa ngjyrë. Për të fituar kohë, për t’i bërë gjërat më thjeshtë, për t’i bërë gjërat më mirë, duhet të punojmë së bashku të gjithë. Duhet të pranojnë politikanët. Iku koha kur mund të bënin si të donin me këtë popull. Iku koha kur qeveritë bëjnë si të duan, e mos të pyesin se çfarë mendojnë njerëzit për to. Iku kjo kohë, nuk ekziston më. Në botën e “Facebook”-ut dhe rrjeteve sociale, idetë lëvizin shumë shpejt dhe emancipimi i njerëzve lëviz shumë shpejt.
Megjithatë ju vetë keni thënë që socialistët, të paktën në këtë moment, vazhdojnë të konsumojnë politikën e faktit të kryer të kryetarit të tyre.
Kokëdhima: Është kulturë sunduese në Shqipëri kjo. Në këtë gjendje janë të gjitha partitë politike. Prandaj ne mendojmë që partitë politike duhet të reformohen me ligj. Ne kemi bërë një ligj që i kemi vënë emrin “Unë zgjedh deputetin që dua”. Është nismë ligjore e cila nuk kërkon që ta votojnë kryetarët e partive. Jo, dhe as nuk u drejtohet thjeshtë grupeve parlamentare të partive poltike. Kjo nismë është një ligj i hartuar jo sipas rekomandimeve të OSBE/ODIHR-it në Tiranë, sepse edhe pa të njësoj do të ishte. Prania e tyre këtu nuk i ka bërë zgjedhjet tona as më të lira, as më të ndershme e as më të drejta. Ato kanë 26 vjet dhe vazhdojnë bëjnë raporte e zgjedhjet tona nuk janë kurrë në standardet që duhet të ishin. Ndërkohë që rekomandimet e OSBE/ODIHR-it për Bashkimin Europian janë komplet një histori tjetër, një botë tjetër, standarde të tjera. Ligji që ZGJIDHJA ka përgatitur bazohet pikërisht në standardet e partive politike të Evropës, Britanisë së Madhe dhe Shteteve të Bashkuara të Amerikës. Këtë ligj ia kemi çuar popullit për ta firmosur derë më derë. Do ta vazhdojmë këtë punë derisa ta firmosin të paktën një milionë e gjysmë shqiptar. Nuk është një ligj që duhet të bëjë përfitime Kokëdhima dhe njerëzit e ZGJIDHJES, nuk është një ligj nga i cili do të nxjerr unë ndonjë të mirë personale. Nuk është një ligj që do ta shfrytëzoj unë për t’u bërë deputet, e as që do të më bëjë mua deputet apo pushtetar. Është një ligj që do t’i japë të drejtën çdo qytetari të Shqipërisë që të zgjedhë vetë përfaqësuesit, të votojë përfaqësuesit e tij në çdo nivel. Është një ligj që do t’ua marrë pushtetin abuziv kryetarëve të partive, dhe do t’ia kthejë bazës së partive. Është një ligj që do t’ia marrë kompetencat Tiranës dhe t’ja kthejë popullit të Shkodrës, që ky popull t’i zgjedhë të gjithë përfaqësuesit e vet. Dhe përfaqësuesit e tij kur të shkojnë në Parlament, të mos përdoren si lolo nga askush, por të përdoren nga interesat e bashkuara të qytetarëve që i zgjedhin këta deputetë. Ta ushtrojë mandatin deputeti në përputhje me interesin kombëtar, kriteri numër një. Në përputhje me interesin popullor, kriteri numër dy. Dhe pastaj edhe në interesat e shumicës politike. Por jo interesi i shumicës politike, mbi interesin kombëtar, mbi interesin popullor. Nuk vlen populli gjë sot në kulturën që manifestohet në këto standarde që jemi. Këtë nismë ligjore që është nismë e qytetarëve të Shqipërisë, do t’ia çojmë edhe popullit të Shkodrës, shtëpi në shtëpi dhe derë më derë. Në qoftë se qëllimet tona janë qëllimet e këtyre njerëzve, ky popull do ta firmosë. Dhe kur të bëhen një milionë e gjysmë firma do ta çojmë në parlament. Do ta çojmë me një vetëdije të madhe të qytetarëve, të cilët nuk firmosin një letër kot, por thonë se ky është problemi im. Ky standard duhet të vendoset. Unë duhet të fitoj të drejtat e mia në sistemin politik. Unë duhet të jem një gjë e rëndësishme në këtë vend, unë nuk mund të jem më askushi në këtë vend, një numër në listën zgjedhore që duhet t’i jap votën një kryetari që nuk më shikon, që nuk më takon, që nuk më përfaqëson.
Duke marrë shkas nga përgjigja juaj në lidhje me ndërkombëtarët, politika shqiptare është kaq infantile sa ndërkombëtarët mundohen ta orientojnë apo ka me të vërtetë interesa ndërkombëtare në politikën shqiptare?
Kokëdhima: Në Shqipëri është në fuqi sistemi i partitokracisë dhe i ambasadorokracisë. Nuk ndodh askund në Evropë, nuk ndodh askund në asnjë vend demokratik të botës kjo. Ky sistem do të shembet dhe do të bjerë kur populli shqiptar të ketë vendin e tij në demokraci, kur populli të ketë mundësi të zgjedhë përfaqësuesit, të ketë mundësi të miratojë ligje dhe referendume, të ketë mundësi të jetë Zot në shtëpinë e vet dhe të ketë rol të rëndësishëm në këtë vend. Të jetë sovran që ushtron vullnetin e tij me votim të drejtpërdrejtë, që mund ta përtërijë dhe ta shkarkojë elitën politike, që mund të refuzojë individë të caktuar dhe të sjellë në përfaqësim individë të rinj.
Duke kaluar sërish te zhvillimet politike, pikërisht a e shikoni edhe si pasojë e kërkesës suaj, pra të ZGJIDHJES por edhe të forcave të tjera politike dhe shoqërisë shqiptare këto ndryshimet që ndodhën në qeveri?
Kokëdhima: Qeveria nuk duhet të fshihet pas gishtit. Kriza sot është reale dhe duhet parë me kurajo në sy. Nuk mund të shkojë një vend në zgjedhje pa opozitën. Pa opozitën mund të shkosh në luftë, por jo në zgjedhje. Dhe Shqipëria është mjaft e lodhur nga konfliktet, nga spiralet e luftës dhe nga luftrat e nuk dëshiron gjëra të tilla. Duhet të jetë e qartë për të gjithë, nuk i ikim dot më nevojës për t’i pastruar përfundimisht zgjedhjet. Nuk duam më zgjedhje me standarde gjysmake, duam standarde finale si në të gjitha vendet e botës. E socialistët e thjeshtë të këtij vendi, ashtu si qytetarët e ndershëm të këtij vendi, ashtu si inteligjenca e përgjegjshme e këtij vendi, duan përfundimisht pastrimin e zgjedhjeve në Shqipëri, zgjedhje të lira dhe të ndershme. Duke qenë se në zgjedhje ne nuk shkojmë dot me opozitën, çfarë duhet bërë? S’ka nevojë të humbë kohë Shqipëria. Duhet patjetër që qeveria dhe opozita të ulen dhe të bëjnë zgjidhjet e duhura. Të bëjnë reformën zgjedhore. Të vendosin votimin elektronik në qendrat e votimit, numërimin elektronik dhe administratën shtetërore apartiake. Të zgjidhet njëherë e mirë kjo histori. Dhe problemi i zgjedhjeve të dalë nga axhenda politike e Shqipërisë. Zgjedhjet të mos diskutohen më në Shqipëri, të jenë të pastra. Reforma zgjedhore është mëma e të gjitha reformave, është reforma e të gjitha reformave. Është reforma numër një, është reforma më prioritare. Asgjë tjetër nuk ka më të rëndësishme në axhendën politike të Shqipërisë, se sa reforma zgjedhore.
Z.Kokëdhima ju keni bërë një platformë të mirëfilltë poltike dhe që përqëndrohet kryesisht në disa pika të cilat janë shumë të prekshme për jetën e shqiptarëve. Do të filloja së pari me kanabisin, ku ju në fillim thatë që duhet luftuar kanabisi dhe mafia e drogës rrezikon zgjedhjet. A vazhdoni të mendoni se legalizimi i kanabisit është një prej zgjidhjeve të tkurrjes së trafikut?
Kokëdhima: Kanabisi nuk është fjalë e keqe, as nuk është një bimë e keqe. Është një bimë e bekuar nga Zoti, ka cilësi të jashtëzakonshme. Me kanabisin mjekohen 170 sëmundje, të cilat nuk kanë mjekim alternativ efektiv. Me kanabisin prodhohen 50 mijë artikuj të dobishëm për njeriun. Është një bimë me vlera të pallogaritshme. Sot bota po ndërton një ekonomi shumë fitimprurëse të kanabisit dhe ne duhet të përfitojmë nga kjo ekonomi. Ne nuk duhet të kemi frikë nga kanabisi. Kush do të pijë kanabis sot, e gjen kudo. Ata kriminelët që shpërndajnë kanabis, i keni në çdo rrugë, në çdo lagje, në çdo shkollë, në çdo fshat, kudo. Kanabis tani mbjellin edhe nëpër ballkone, në qytete, jo më nëpër fshatra e nëpër bashki. Nuk është problem a e gjen kanabisin ai që do ta pijë. Ne nuk investojmë si shtet dhe si qeveri për ta ndihmuar rininë dhe familjet që kanë pjesëtar që kanë vartësi nga drogërat. Unë kam një ndjeshmëri shumë të lartë për çështjen e përdorimit të drogërave. Ai i ri që përdor drogë, e komprementon shumë rëndë të ardhmen, karrierën, shëndetin dhe pozitën e tij sociale. Jam shumë i ndjeshëm rreth faktit që qeveria duhet të ketë baza të dhënash, projekte. Si mund ta ndihmojmë ne një të ri dhe të re që përdor kanabis? Duke e futur në burg? Duke e futur në burg ne e shkatërrojmë atë dhe familjen e tij. Nuk është zgjidhje represioni ndaj njerëzve që përdorin dhe pijnë kanabis. Ndërgjegjësimi është zgjidhje, edukimi është zgjidhje, asistenca është zgjidhje. Të dhënat dhe reegjistrimi është zgjidhje. Dhe nuk është zgjidhje që t’i bijmë në hu atyre që pijnë hashash dhe të lëmë të livadhisin mafiozët e drogës, ata që bëjnë miliarda e miliarda në këtë vend. Nga kjo pikëpamje ne kemi nevojë që ti shohim gjërat me një sy tjetër. Kush është syri që do të shohim gjërat? Së pari duhet të dekriminalizojmë përdorimin e marijuanës. Ai që pi hashashin dhe drogën është më mirë që të shkojë të regjistrohet me kartën e identitetit në farmacinë e shtetit dhe të bëjë pjesë në bazën e të dhënave dhe shteti të ngarkojë sociologë e ta edukojmë këtë njeri, të ndihmojmë familjen e tij me rehabilitime e me të gjitha gjërat e tjera. Të marrim përgjegjësi si shoqëri dhe shtet, se sa të mbyllim sytë e të shkojnë te kriminelët. Padyshim që kanabisi duhet të legalizohet në Shqipëri, kanabisi farmaceutik dhe ai industrial. Ne kemi sot ligjin më absurd në botë. Niveli i THC-së për kanabisin, në gjithë dynjanë është 0.3 për qind kufiri, ne e kemi 0.1. Pra edhe në këtë fushë ne nuk lejojmë një përcaktim konkurues. Kështu që ekonomia formale e kanabisit është një mundësi pozitive për vendin dhe për popullin tonë. Padyshim që ne duhet ta shfrytëzojmë këtë mundësi. Ne nuk jemi një vend që të themi s’kemi nevojë për këtë. Ne kemi nevojë për çdo gjë. Që kur e rrëzuan Lazaratin, unë e pyeta ministrin e Bujqësisë në komisionin parlamentar të ekomomisë, në 24 nëntor të vitit 2014, dhe i thashë: “Ju nuk keni investime për bujqësinë, pse nuk e mbron brand-in e Lazaratit dhe ta kthejmë në një ekonomi kombëtare atë? Ta grumbullojë shteti dhe të vendoset monopoli i rreptë i shtetit”. Por nuk ndodh kjo. Kur them monopoli i rreptë i shtetit, kjo do të thotë që të mos ketë hapësirë për mafien e kanabisit dhe të ketë një strategji komplekse që parashikon edhe legalizimin, edhe dekriminalizimin, që parashikon edhe asistencën e plotë për bujqësinë. Ku do të shkojë ajo ushtri e madhe e të papunëve, që jetojnë në fshat ose kanë zbritur në qytet dhe që nuk kanë asnjë mundësi jete. Në qoftë se ne nuk u japim mundësi dhe alternativa jete këtyre njerëzve, si do t’i themi atij? Do të të fusim në burg? Kush do të paguajë për të në burg? Ne kemi një politikë irracionale, që vetëm shkakton kosto. Kosto financiare. Për çfarë i harxhojmë të gjithë ato para për Policinë e Shtetit, e cila medemek po lufton marijuanën? Që të mbajmë represionin për ta bërë më të vështirë tregun, për t’i bërë gjërat më të vështira? Që të jetë korrupsioni më i lartë, që të jetë interesi më i lartë? Ne duhet të ngrejmë bujqësinë, të subvencionojmë 150 milionë dollarë, minimumi, edhe më shumë që gjithë bujqësia të funksionojë, që të eksportojmë ushqimet. 150 milionë euro i ka dhënë Maqedonia bujqësisë. Sot importojmë 1 miliardë dollarë ushqime për popullin. Një vend si i yni, një vend që në kohën e komunizmit eksportonte në Europë qindra milionë dollarë ushqime, ndërsa sot importon 1 miliardë dollarë ushqime në vit, megjithëse kemi këtë diell, me këtë ujë, këtë tokë dhe me këto dije dije që kanë njerëzit tanë. Pra, ne na duhet që të ngrejmë bujqësinë, që t’u japim mundësi fshatarëve që të jetojnë me punë të ndershme, që të përfitojnë nga ekonomia botërore e kanabisit, që të kemi një ekonomi të ligjshme, sepse vetëm ajo e lufton ekonominë e paligjshme. Vetëm kjo i denoncon gjithë policët dhe funksionarët e tyre që implikohen në trafikun e lëndëve narkotike. Çështja e kanabisit do një strategji komplekse që edhe të përfitojmë të mirat ekonomike siç përfiton çdo vend në botë. Janë mbi 100 shtete që e shfrytëzojnë kanabisin farmaceutik. Përse nuk e ka Shqipëria? E kanë legal të gjithë fqinjët tanë. Përse një i sëmurë me kancer që ka nevojë për vaj kanabisi nuk e mer dot legalisht dhe duhet ta marë ilegalisht?! Për çfarë arsye? Kemi frikë ne, kur gjithë dynjaja është komplet në një situatë tjetër. Pse gjithë dynjaja është komplet në një situatë tjetër dhe ka ekonomi më të mire? Vendet që nuk kanë pasur as përvojën tonë, as klimën tonë dhe as kushtet tona mjedisore. Dhe bëjnë ekonomi më të mirë. Nuk është trembur populli ynë nga marijuana. Nuk e shpikëm ne, ajo është e vjetër dhe shqiptarët e kanë njohur më pare. Edhe në kohën e Enver Hoxhës është studiuar në qendrat e kërkimeve bujqësore. Është prodhuar madje. Nuk kemi pse të kemi frikë nga kjo gjë. Nuk mund të lejohet që mafia të bëjë gjithë këtë trafik, ndërsa shteti nuk bën asgjë, humbet para dhe bën shoë se po prish ato rrënjët nëpër male. Është një shoë që nuk i duhet dreqit. Duhet të ketë kontroll të plotë mbi këtë ekonomi, ndërkohë që populli duhet të fitojë para mbi këtë. Institucionet këtu na blejnë deputetët, na blejnë zgjedhjet, ne çfarë fitojmë.
Duke qenë se përmendët edhe bujqësinë, dhe po ashtu çështjen e kanabisit, ajo çfarë më ka bërë përshtypje është se ju po bëni politika proteksioniste për bujqësinë. A shkon në kah të kundërt me atë kah logjor që është trajtuar deri më tani për një tregti të lirë dhe të hapur?
Kokëdhima: Shqipëria nuk bën dot as bomba, as makina, as raketa. Ne mund të bëjmë perime, zarzavate. Mund të bëjmë ushqime për popullin tonë, por edhe eksport për prodhime bujqësore. Ne kemi një klimë dhe kushte favorizuese. Nga kjo pikëmpamje kemi nevojë për një plan, që po të negocionet me marrëveshjet ndërkombëtare sigurisht që e gjejmë gjuhën, sepse është e arsyeshme. Që të ngrejmë ekonominë tonë bujqësore është shumë e arsyeshme. Por, duhet të zgjidhim shumë historira. Duhet të zgjidhim tregun e tokës, kullimin, vaditjen, mbrojtjen e bimëve. Janë një numër i pafundëm çështjesh që duhen trajtuar me shumë kujdes nga institucionet e qeverisë për ta ngritur bujqësinë tonë dhe për ta bërë të zhvilluar, jo për të importuar për nevojat bazë të ushqimit. Ato le të prodhohen më Shqipëri. Shqipëria duhet të eksportojë, se s’kemi ç’bëjmë më.
Z. Kokëdhima do përqëndrohem te një pikë që është ajo e ligjit të importiit të mbetjeve. Ju jeni ndër partizanët e flaktë të kundërshtimit të riciklimit të mbetjeve në vend. Edhe në takimet tuaja me përfaqësuesit e Zgjidhjes e keni përmendur këtë fakt.
Kokëdhima: Shqipëria është tokë e synuar me forcë nga ekomafia dhe do të mbetet e tillë. Është një vend shumë i rrezikuar nga mafia ndërkombëtare e plehrave dhe do të mbetet një vend shumë i rrezikuar nga mafia e mbetjeve radioaktive, kimike, etj. Kush nuk e kupton këtë është naiv. Shqipëria është një vend pa standarde, rrunpallë, i mbushur me njerëz të korruptuar, me një shtet ku livadhisin mafiozët e drogës. Nuk mundet që një vend i tillë të hapë shtigje për të kaluar mbetje të rrezikshme në vendin tonë. Nuk mundet, sepse çdo shteg që do hapësh t’i gjen shtigje edhe në sistemet e vendeve europiane që janë shumë të konsoliduara. Asnjë shteg s’duhet të ketë Shqipëria as për mbetjet me riciklim, as për tranzit. Pranimi i këtyre të dyjave është të pranosh rrezikun në vend që kjo tokë të bëhet e pajetueshme. Kemi qysh në vitin 2004 dhe deri më sot që kjo tokë vuan. Plot 15 vite që unë i kam kushtuar një rëndësi shumë të madhe kauzës së mafies dhe mbetjeve të rrezikshme. Ky vend nuk ka rrugë tjetër përveçse të mbyllet nga çdo lloj industrie që do të sjellë mbetje për riciklim etj. Edhe ky moment që mediat janë duke informuar për ato kontenierët është një çështje shumë e rëndësishme, të mendosh që janë groposur këto mbetje te ne. Por, Shqipëria është shumë e rrezikuar nga mafia e plehrave.
Një tjetër pikë e rëndësishme e platformës suaj është në lidhje me shpronësimet e qytetarëve ku kërkoni që vlera të jetë sipas tregut. Pse i keni dhënë kaq rëndësi një pike të tillë?
Kokëdhima: Kemi dy çështje në këtë drejtim, problemin e legalizimeve dhe atë të shpronësimeve.
Përmenda legalizimet sepse kryeministri në Shkodër tha që i kemi përfunduar pothuajse procesin e legalizimeve dhe kemi bërë një hap të madh.
Kokëdhima: Jo, nuk e kam fjalën për këtë aspekt. Kemi shumë drama dhe tragjedi në jetën e familjeve për shkak të prishjeve dhe shpronësimeve. Por, të qëndrojmë në radhë të parë te prishja. ZGJIDHJA është kundër të ashtuquajtuarave VKM-ra, të cilët përjashtojnë nga e drejta e legalizimeve ndërtesa të caktuara që janë bërë në zona ku ka projekte për të bërë investime publike. Kur e bën një krim, si kur e bën te Kafja e Madhe në Shkodër, sikur e bën në Muriqan, apo në Lezhë është e njëjta gjë. Kushtetuta thotë: për të njëjtin krim dënohesh njësoj dhe për të njëjtën punë duhet të paguash njësoj. Si mund të themi ne ty se do ta legalizojmë shtëpinë, ndërsa ty tjetrit nuk ta legalizojmë se ti e ke bërë në filan zonë ku bie një projekt public?!. Jo, ata që kanë bërë ndërtime të paligjshme i kanë bërë me bashkëpunimin e shtetit. Ia ka shkelur syrin politikani sa herë kanë ardhur votimet dhe i kanë thënë hidhe një kat, bëje një shtesë tjetër se ta legalizoj unë, të ndihmoj unë etj., etj. Ne nuk mund t’i themi dikujt ty do ta legalizojmë shtëpinë, ndërsa ty tjetrit nuk ta legalizojmë. Të gjitha pronat e ndërtuara paligjshmërisht përpara vitit 2013, përpara se të vinte qeveria e majtë, e cila ka vendosur kontroll mbi territorin me ligj që e dënon ndërtimin pa leje, megjithëse tani, në prag zgjedhjesh kanë filluar të shfaqen prapë të njejtat sjellje zakoni që kanë filluar prapë të ndërtohen në prag zgjedhje dhe të mbyllet ndonjë sy dhe kjo do ishte një faktkeqësi e re për Shqipërinë dhe nuk duhet të ndodhi. Pra çdo ndërtim që është bërë në kushte të njejta duhet të legalizohen që të gjitha. Nuk duhet të ketë shtëpi dhe dyqan që prishet për interes publik. E dyta, duhen shpronësuar me vlerën e tregut. Nuk mund të jetë fatkeqësi për një banor që bie një projekt publik. Në qoftë se pronën time e do shteti, ajo duhet të vlejë më shumë, jo më pak. Janë mijëra raste kur qytetarët shpronësohen me gjysmën e cmimit ose me 30 %-60 % të çmimit. I bie që një person që ka shtëpi, të dalë nga shtëpia dhe të bëhet i pastrehë. Çfarë politike është kjo? Në qoftë se do qeveria pronën time ky është një lajm i madh për mua. Vlera e pronës time është e lartë dhe unë duhet të kem mundësi që të mos bjerë statusi im ekonomik. Janë mijëra raste që ne ju kemi shkaktuar drama banorëve të Shqipërisë dhe që i kemi shpronësuar për interes publik. Duhet të marë fund kjo histori. Ato VKM-të janë një letër A4. Nuk janë asgjë. Vlejnë 0 lekë. Ndërsa, një familje që ne e shkatërrojmë për shkak të këtyre VKM-ve është diçka shumë e rëndë. Prona duhet të shpronësohet në mënyrë të drejtë duke i dhenë edhe fitimin e munguar, që të ketë mundësi të ushqehet për dy vite, deri sa ta ngrejë prapë biznesin në një vend. Edhe për shtëpinë. Se vendimi për të blerë shtëpinë është vendim jete, nuk është vendim që mund të merret për një natë. Konkluzione të arritura nga fatkeqësi që ne i kemi ndeshur në ato 30 muaj që unë isha deputet. Dua t’ju tregoj dy-tre shembuj të thjeshtë. San Trope në Vlorë e blenë dy biznesmenë para se të prishej, nga 450 mijë euro secili. Kur e shpronësoi qeveria i dhamë 150 milionë lekë të vjetra secilit. Njërin nga këta pronarë unë e kam në rreth njohjesh, e la Shqipërinë sivjet. Mori 150 milionë lekë dhe humbi në atë biznes gjithë atë pasuri. E la Shqipërinë dhe iku, s;do t’i kujtojë as emrin. Një sjellje e tillë nuk mund të ndodhë. Ne nuk jemi këtu për të shkatërruar jetët e njerëzve. Atje në Vlorë, ne kishim një rast të një banori, që humbi lekët në piramida kur ishte 60 vjeç. Nuk u tremb. Tha: jam i ri akoma. Kam ende forcë, energji, do punoj dhe do bëj prapë gjithçka. Dhe bëri një shtëpi 3 katëshe. Ne e prishëm atë shtëpi. Dhe i thamë: ty s’të zë ligji për legalizim. Në moshën 80 vjeç e nxorrëm të pastrehë. Ai kishte tre djem dhe bëri tre kate shtëpi dhe tha do iu le fëmijëve nga një apartament që të thonë se babai ynë bëri diçka në këtë jetë. E zhgënjyem. Shyqyr, për fat të mire, mbrëmë më njoftuan kolegët që ai e ka në rrugë gjyqësore procesin dhe ka arritur të marrë një mbështetje për këtë çështje dhe shpresoj që t’ia dalë, por si këto ka shumë raste.
Edhe në Shkodër çështja e stadiumit paraqet konflikte të mëdha midis qeverisë edhe bashkisë. Është çështja e gjashtë shtëpive që kërkojnë dëmshpërblim.
Kokëdhima: Është e drejtë elementare njerëzore. Nuk kam asnjë negativitet me qeverinë. Absolutisht. Ky ka qenë qëndrimi im gjatë gjithë kohës dhe kam bërë shumë përpjekje të mëdha për këtë çështje. Është diçka që nuk duhet diskutuar. As një kotec pulash nuk mund ta prishë dhe prekë qeveria, pa e paguar me çmimin e tregut. Nuk mund të jetë fatkeqësi dhe zhgënjim për askënd një investim publik. Të drejtat e tyre duhen respektuar si të shenjta, si Zoti vetë.
Z. Kokëdhima keni qenë i vetmi politikan i të majtës që jeni shprehur se investimet në Shkodër janë të pakta?
Kokëdhima: U nisa nga ai thumbi që i bëri kryeministri kryetares së bashkisë, që tha ka dy vite që flenë gjumë. Unë s’mund ta them këtë gjë. Ajo çka di unë është diçka tjetër. Shkodra është parë pak jo në mënyrë të barabartë për sa i përket projekteve të qeverisë me bashkitë e tjera të vendit. Kështu vetëm në projektin e Rilindjes Urbane të vitit 2016, Shkodra ka marë 102 milionë lekë, 20 herë më pak se Bashkia e Tiranës. 9 herë më pak se Bashkia e Korçës, 5 herë më pak se ajo e Divjakës. Nga kjo pikëpamje ajo që unë trajtova në takimin që ju ka bërë përshtypje ju, është se edhe qeveria qendrore ka shumë përgjegjësi për të mbështetur punët e bashkive, sepse bashkitë tona janë bashki pa burime, janë bashki që nuk kanë aftësi të investojnë pa financime nga buxheti i shtetit.
Z. Kokëdhima një pyetje e fundit, lidhet tashmë me atë çfarë parashikoni që do të ndodhë në politikën shqiptare. A do të ketë votime më 18 qershor dhe cili do të jetë pozicioni i lëvizjes suaj?
Kokëdhima: Ta zë nga kjo e dyta. Pozicioni i lëvizjes sonë është i qartë. Momentalisht, lëvizja është e fokusuar në zgjidhjen e problemeve të akumuluara nga një tranzicion i gjatë, i dhimbshëm dhe i mundimshëm për popullin tonë. Shqipëria vuan këtë situatë pikërisht nga këto probleme. Ne duam që me vërtetësi të vëmë gishtin në plagë dhe të ftojmë qytetarët e Shqipërisë që bashkarisht të bëjmë zgjidhjet e duhura dhe të vërteta. Nuk mund të mjekojmë një njeri të sëmurë nga sëmundje serioze me aspirina. Duhet t’i japim terapinë që i duhet. Edhe sistemit tonë politik duhet t’i japim terapinë që i duhet. Përndryshe, nuk ecim. Ndërsa, përsa i përket prognozës, unë mendoj që pa opozitën nuk shkojmë dot në zgjedhje. Ato deklarata që thonë të kundërtën janë të papërgjegjshme. Unë mendoj që për sa kohë opozita ka deklaruar që nuk shkon në zgjedhje pa garancitë e nevojshme, pra pa refomën zgjedhore dhe garanci politike, që mund t’i negociojnë, unë mendoj që zgjedhjet do të shtyhen. Do të gjendet një kompromis mes palëve që t’i japë zgjidhje përfundimtare çështjes së zgjedhjeve të lira e të ndershme në Shqipëri. Vetë Zgjidhja është e investuar për këtë gjë. Që nga kjo krizë të përfitojë Shqipëria. Të ndahemi nga një problem kaq i rëndësishëm për demokracinë dhe shtetin ligjor. Nga zgjedhjet e lira, fillon drejtësia, pa zgjedhje të lira nuk ka drejtësi.
Edhe një pyetje tjetër. Mendoni që e majta mund të çahet, duke ju përfshirë ju, z Blushi me partinë e tij, z. Meta me LSI-në. Ju bashkë me z. Blushi mund t’ju quajmë oponentët më të fortë të qeverisjes. Mendoni që e majta mund të ketë çarje?
Kokëdhima: Në raportin me të majtën unë me Blushin kemi diferencë të thellë, sepse unë jam brenda së majtës, punoj me ato parime qe ju përmenda. Edhe LIBRA, sot nuk është një faktor që mund të ndikojë zhvillime të caktuar në kontekstin e krizës. Është tjetër gjë LSI që është një faktor me rëndësi. Mendimi im është që LSI-ja kurrë nuk mund të futet në zgjedhje pa opozitën, sepse nuk do të guxonte, mendoj, që të marrë përsipër një faturë të rëndë për destabilizimin e vendin dhe futjen e tij në nëj spirale të re dhune dhe konfliktesh. Të gjitha gjërat besoj se do të shkojnë në këtë mënyrë. Shqipëria tani duhet t’i zgjidhë gjërat në mënyrë paqësore, me dialog dhe me kompromise. Nuk mund ta kthejmë më vendin në ato hijet e konflikteve të rënda që kemi kaluar.
Edhe diçka doja të shtoja, nëse më lejoni. Shkodra është një qytet shumë interesant dhe shumë i dashur. Unë kam koleksionuar shumë objekte nga historia e këtij qyteti, vepra dhe të figurave të shquara të këtij qyteti. Kam edhe shumë njohje. Kam njohur edhe në shkollë djem edhe vajza që tani janë burra dhe gra me talente të shkëlqyera, si Gaz Hoxha, Elida Barbullushi, Nuri Domi, Gjon Koliqi etj. Është vërtetë një qytet i bekuar pavarësisht nga vështirësitë e mëdha që rezervoi politika e këtyre 26 vjetëve, jo thjesht për Shkodrën, por për gjithë Shqipërinë, edhe vështirësitë e mëdha që rezervoi ky tranzicion.
0
Arsyet pse Rama i shmanget ZGJIDHJES

Arsyet pse Rama i shmanget ZGJIDHJES

 

Kryeministri i Shqipërisë iu shmang pyetjeve të moderatores Eni Vasili për lëvizjen Zgjidhja që unë kam nisur brenda PS-së prej nëntorit 2016. Nuk shpresoja të ndodhte e kundërta në përballjen publike të z.Rama. Nuk jam shkëputur nga PS-ja. Kam kontribuar më shumë se kushdo tjetër në atë parti për të majtën shqiptare. Unë vijoj të jem anëtar i Asamblesë Kombëtare të PS-së, përderisa nuk ka asnjë vendim të shkruar për përjashtimin tim nga ky forum i PS-së. Përpjekja për të më larguar nga PS dhe politika është një vepër e llogaritur nga Edi Rama për të ndërprerë procesin e reformimit në PS, që nisi në rajonin e Vlorë-Gjirokastër. Kjo reformë u konceptua si një revolucion politik që nuk do ta linte më PS-në si çiflig të kryetarit. Në 3 vitet e mia si deputet e drejtues politik, ne arritëm të tre dhe katër fishonim anëtarësinë e PS-së, të zhbënim PD-në në zgjedhjet vendore të qershorit 2015 dhe të hapnim PS-në për të rinjtë. Përmbysja e skemës se si funksiononte PS-ja në bazë, i nxorri jashtë loje funksionarët dhe deputetët që i kanë parë zonat elektorale si lopë për t’u mjelë dhe zgjedhësit si dele që duhet vetëm të japin votën sa herë ka zgjedhje.
Rama ka frikë nga Zgjidhja dhe idetë e saj. Ai nuk dëshiron të flitet për këto ide, trembet nga ballafaqimi dhe nga debati i hapur dhe transparenca. ZGJIDHJA u krijua si nevojë e militantëve të bazës socialiste dhe qytetarëve të thjeshtë të Shqipërisë për t’u dëgjuar zëri i tyre, për t’u njohur e respektuar të drejtat e tyre. Zgjidhja është një lëvizje politike brenda PS-së. Ajo nuk e përçan partinë, e bashkon, nuk nxit largimet prej saj, e zmadhon dhe e hap atë, nuk do që në parti të ketë vend vetëm për ata që pëlqen kryetari dhe që shërbejnë pushtetin e tij, por të ketë vend dhe të luftohet për lumturinë e të gjithëve. Aq e shkëputur është udhëheqja nga baza sa me të drejtë mund të themi se kemi dy parti socialiste, partinë e bazës dhe partinë e udhëheqjes. Partia e bazës nuk ndihet e përfaqësuar nga partia e udhëheqjes. Partia e udhëheqjes e gënjen, e abuzon, e shfrytëzon, takohet me të vetëm në kohë fushatash elektorale, pastaj nuk e njeh më, nuk e dëgjon, nuk i hap telefonin, nuk e shërben, nuk do t’ia dijë për të. Partia e undhëheqjes e shkel, e manipulon dhe e vjedh bazën socialiste dhe popullin shqiptar.
ZGJIDHJA gëzon mbështetje të gjerë në parti e në popull. Takimet tona kanë interes të madh. Qytetarët i pëlqejnë idetë e ZGJIDHJES. Shumica e heshtur e socialistëve mbështesin ZGJIDHJEN. Socialistët e thjeshtë janë me ZGJIDHJEN. Ata janë të heshtur, sepse nuk duan të ndëshkohen nga pushteti i kryetarit. Në këto takime që kam patur, shumica e njerëzve që mbushin sallat janë anëtarë të PS-së, votues tradicionalë të saj por që janë lënë në mes të katër rrugëve nga qeverisja jonë.
Prishjet e shtëpive dhe shpronësimet janë kthyer në fatkeqësi për qindra familje, që ende nuk kanë marrë dëmshpërblimet për pronat e tyre. Shumica e qytetarëve nuk kanë përfituar asgjë nga mandati gati 4-vjeçar i qeverisjes së majtë. Sot ata ndjehen edhe më të varfër dhe të më përbuzur se në qeverinë e Saliut.
Në takimet e mia nuk vijnë të punësuarit në administratën shtetërore, sepse Rama do t’i hiqte direkt nga puna, siç ka bërë me dhjetra djem dhe vajza vetëm pse kanë pëlqyer, apo komentuar statuset dhe tezat e mia në Facebook.
Në takimet e mia vijnë edhe simpatizantë të partive të tjera, që janë lodhur së përdoruri për vota nga kryetarët e tyre dhe që shohin shpresë te tezat që artikulojmë ne për daljen nga tuneli i errët i tranzicionit 26-vjeçar. Ata duan të dëgjojnë e të dëgjohen. Nuk i marrim me dhunë duke i kërcënuar me vendin e punës, siç mund të bëjë Rama. Ky shantazhon simpatizantët dhe anëtarët e Zgjidhjes.
Nisma qytetare ligjore: “Unë zgjedh deputetin që dua” është për të reformuar Partinë Socialiste dhe të gjitha partitë politike në Shqipëri, nga poshtë dhe me ligj, duke i kthyer nga bashkësi parapolitike që janë sot, në parti moderne politike. Përballë partive të kryetarëve janë shqiptarët që duan një demokraci kushtetuese funksionale, që duan ta rrëzojnë kastën sunduese të tranzicionit dhe tiraninë e skamjes dhe korrupsionit, shqiptarët duan ta shembin regjimin e kalbur të partitokracisë dhe diktaturën e neveritshme të kryetarëve, duan të demokratizojnë partitë dhe qeverisjen e vendit, duan t’ua heqin pushtetin abuziv kryetarëve dhe të vendosin vetë se kush do të jenë kandidatët për deputetë, kryetarë bashkie dhe këshilltarë që do të zgjidhen përmes zgjedhjeve paraprake të hapura. Kësisoj kryetarët nuk do të emërojnë dot më si kandidatë për deputetë njerëzit e tyre, sepse do t’i zgjedhin anëtarësia e partisë dhe qytetarët e thjeshtë të Shqipërisë. Asnjë person nuk do pengohet të konkurojë dhe në krye të punëve të shtetit e të popullit do të vijnë djemtë dhe vajzat me të mirë e më të aftë të këtij vendi dhe jo më si deri tani që vinë tutkunët dhe servilët e kryetarëve.
Kryetari i qeverisë dhe i PS-së së udhëheqjes tha në studion e Eni Vasilit se unë paskam vendosur që të shkëputesha nga PS-ja dhe kjo ishte zgjedhja ime. Ky është spekulim i Edi Ramës. Zgjdhja ka insistuar që të punojë brenda PS-së, me gjithë dhunën dhe represionin që po bëhet mbi përkrahësit dhe anëtarët tanë, që kërcënohen me bukën e gojës e mizorisht nga Rama, siç ua bënte dikur Saliu në të shkuarën e afërt.
Udhëheqja e PS-së është autokratike, forumet e saj nuk informohen, nuk diskutojnë e vendosin për asgjë kolegjialisht. Grupi parlamentar, Asambleja Kombëtare dhe Kongresi kanë rënë plotësisht dhe këto forume përdoren vetëm për demagogji e PR nga kryetari dhe ministrat e tij.
Kam kërkuar të mbahet Kongresi i Jashtëzakonshëm i PS-së, sepse na duhet një plan dhe reagim i jashtëzakonshëm, na duhet të riformulojmë një strategji të re, një marrëveshje të madhe për të rivendosur besimin dhe bashkëpunimin e shkatërruar në parti e në koalicionin e majtë dhe midis koalicionit të majtë dhe elektoratit. Kongresi duhet të merrte vendime historike për ta mbyllur një herë e përgjithmonë kapitullin e vjedhjes, blerjes dhe manipulimit të zgjedhjeve, për të zgjidhur përfundimisht këtë plagë të rëndë që nuk e lë Shqipërinë të ngrejë kokë dhe për t’i dhënë fund krizës aktuale dhe për ta nxjerrë opozitën nga çadra në bulevard. Kongresi i Jashtëzakonshëm duhet të miratonte masa urgjente për pastrimin e qeverisë nga pjesët e korruptuara e të implikuara në krim e në korrupsion, për të zhdukur mafien e drogës dhe trafikimin e saj, për t’i krijuar mundësi bazës së partisë dhe qytetarëve të vendit të marrin pjesë në qeverisjen e vendit, për ti vënë pushtetet nën kontrollin e ligjit dhe në shërbim të popullit, jo ne shërbim e në kontrollin e kryetarit, për t’i çliruar mediat nga shtrëngimet dhe nga blerja, për të mundësuar që përfaqësuesit në parti e në parlament të zgjidhen me primare e nga baza, jo më nga kryetari.
Në vend të kësaj Edi Rama dhe ai grusht njerëzish rreth tij vendosën që të mbledhin në fund të muajit prill kongresin elektoral për të çertifikuar listën e kryetarit me kandidatë për deputetë, të cilët do derdhen nëpër qytete dhe fshatra, duke premtuar sërish një katër vjeçar tjetër “Rilindjeje”. Rama dhe ata pak njerëz rreth tij flasin për PS-në si një lokomotivë e madhe. Në këtë rrugë që po e çon Edi Rama këtë “lokomotivë”, PS-ja rrezikon që të prekë, në zgjedhjet e ardhshme, pozitën e vet më të keqe historike. Ajo rrezikon të mos arrijë dot e vetme numrin 60 të deputetëve, duke e siguruar per pak muaj me sukses vendin në opozitë dhe dëgimin e kësaj “lokomotive” për skrap.

0
Intervista e Z.Koco Kokëdhima me gazetarin Arian Çani te emisioni “Zonë e lirë”

Intervista e Z.Koco Kokëdhima me gazetarin Arian Çani te emisioni “Zonë e lirë”

Intervista ime me gazetarin Arian Çani te emisioni “Zonë e lirë”
Çani: Koço, mirëmbrëma dhe kënaqësi që të kam në studio.Unë jam shumë i gëzuar që më erdhe, më në fund. Më erdhi shumë inat që s’më erdhe atëherë kur ishe deputet dhe e kishe mirë me Ramën dhe vjen tani që nuk je më deputet dhe nuk e ke mirë me Ramën.
Kokëdhima: Unë jam ende deputet, jam deputet i popullit.
(Çani vjon me historinë e Edipit në Greqinë e lashtë dhe vrasjen e të atit)
Çani: Si t’u duk rrëfimi?
Kokëdhima: Ai krijimi letraro-politik që ju prezantuat është interesant.
Çani: Nuk e hedh poshtë si këndvështrim?
Kokëdhima: Unë dua të them që krahasimi nuk më duket shumë i gjetur.
Çani: Atëvrasja në politikë? I biri që vret të atin, politikisht po flas.
Kokëdhima: Unë flas për ndjesinë në marrëdhënien time me subjektin që ju prezantuat. Unë një herë nuk kam mallkim.
Çani: Nuk e thashë këtë gjë.
Kokëdhima: E ka fabula juaj në themelin e vet. Është fabula e Edipit.
Çani: Po, e di që s’ke mallkim.
Kokëdhima: Nuk kam mallkim as nga të parët e mi, as nga prindërit e mi. Nuk kam pasur asnjëherë djalë dhe kam tri vajza të mrekullueshme, të cilat i dua shumë. As nuk më ka vrarë njeri dhe as nuk do mundë të më vrasë njeri.
Çani: Po e trajtuam kështu sigurisht që ke të drejtë. Ne e trajtuam simbolikisht vrasjen.
Kokëdhima: Përsa u përket çështjeve politike, në politikë unë nuk kam preferuar asnjëherë, jo për të fshehur ndonjë gjë se s’kam gjëra për të fshehur. Por kurrë nuk kam preferuar që të operojmë në mediumet politike me marrëdhënie personale, çështje personale. Si kulturë nuk e pëlqej këtë personalizimin e politikës, edhe humbjen e energjive të publikut në çështje që nuk çojnë në gjëra përpara. Padyshim që goditja e mandatit tim ka qenë një vepër sa e paligjshme aq edhe implikuese për lidershipin e të majtës. Dhe unë i kam shpjeguar këto gjëra vetëm në aspektin politik, sepse kjo është jo vetëm përgjegjësia ime, por edhe interesi publik në këtë çështje.
Çani: Koço, është Edi Rama, mendon ti pas kësaj skeme, pas heqjes së mandatit tënd?
Kokëdhima: Nuk dua të bëj historira të gjata. E kam deklaruar haptazi në Asamblenë Kombëtare të Partisë Socialiste, Edi Rama ka përgjegjësi të drejtpërdrejtë në goditjen e paligjshme të mandatit tim. Mandati im u hoq në rrugë komplotuese. Heqja e mandatit tim ishte vazhdim i luftës politike brenda Partisë Socialiste me mjete, instrumenta dhe mënyra të tjera nga jashtë partisë. Por kjo është diçka që mua nuk më ka pezmatuar. Them shumë sinqerisht, për mua nuk ka pasur asnjë rëndësi kjo në aspketin personal dhe kam pasur vetëm interesin politik, interesin e kulturës politike, edhe të kulturës dhe pasojave që kanë vepra dhe veprime të tilla në jetën e Partisë Socialiste, të së majtës dhe në jetën e politikës së Shqipërisë. Dhe unë në këtë kuptim e kam trajtuar këtë çështje për të përfituar konkluzione politike që na nevojiten për të shkuar përpara, sepse të gjitha këto janë dëshmi e gjendjes dhe kulturës sunduese sot në Partinë Socialiste dhe në partitë e tjera politike në Shqipëri. ZGJIDHJA nuk është një artificë, nuk është as një konjukturë e fshehtë, as ndonjë zhvillim komplotist. Nuk ka as ndonjë qëllim të fshehtë që t’i shërbejë ndonjë plani tim, apo më larg akoma, marrëveshje të supozuar si ato që thatë ju, me Ramën apo me të tjerë. ZGJIDHJA ka ardhur si nevojë e socialistëve.
Çani: Në pamje të parë, te intervista me Eni Vasilin, Rama u duk korrekt se tha “unë i uroj shëndet Koços, e të tjerë”, nuk përdori gjëra fyese, por e çuditshme është se tha “është jashtë Partisë Socialiste kjo që po bën Koço”. Ndërsa ti thua se ZGJIDHJA është pjesë e Partisë Socialiste, je akoma brenda ombrellës së PS-së. Ka një kontraditë Koço, nëse mundësh të ma thuash me dy fjalë. Në një reagim në “Facebook” i je përgjigjur në fund fare se “lokomotiva jote do të përfundojë për skrap”. Pse kaq i egër kur ai faktikisht nuk ka thënë gjë?
Kokëdhima: S’kam dhe nuk do të kem kurrë unë, ngarkesa personale as me Ramën dhe me asnjë politikam tjetër në Shqipëri.
Çani: Ai thotë se ZGJIDHJA është jashtë PS-së.
Kokëdhima: Strategjia politike e Ramës ndaj ZGJIDHJES, që në fillim ka qenë që ta nxjerrë jashtë Partisë Socialiste, debatin për ZGJIDHJEN ta mbyllë dhe ta përjashtojë nga partia. Kështu që edhe veprimet që ai bëri me mua, janë veprime që pajtohen e që shkojnë me këtë strategji. Kjo në fakt, kjo strategji nuk është diçka e shëndetshme, sepse nuk mund të mbyllet debati. ZGJIDHJA ka ardhur si nevojë e socialistëve të bazës për t’u dëgjuar, për t’u respektuar, si nevojë e Partisë Socialiste për të pasur standarde demokratike, për të patur demokraci të brendshme.
Çani: Ai ka vendosur ta konsiderojë jashtë Partisë Socialiste.
Kokëdhima: Është çështje e tij, kjo. Është zgjedhje e tij dhe e njerëzve afër tij që të mos e përballojnë debatin.
Çani: Por që s’janë pak, janë shumë njerëz afër tij.
Kokëdhima: Shumë njerëz janë me ZGJIDHJEN, ta dish, sepse këtë arsyetim duhet ta bëjmë nisur nga tezat e ZGJIDHJES. Kush janë temat e ZGJIDHJES dhe po të prezantojmë këto teza e kuptojmë shumë mirë se çdo qytetar dhe çdo socialist është me këto teza.
Çani: Do ta lëmë për një moment tjetër prezantimin e tezave se duket si fushatë elektorale.
Kokëdhima: Jo nuk është fushatë, është përmbajtja. Ne mund ta paraqesim në mënyrë shumë të thjeshtuar. Kauzat e ZGJIDHJES, kauza e parë e ZGJIDHJES është: zgjedhje të lira e të ndershme. Socialistët e vërtetë të Shqipërisë janë për zgjedhje të lira e të ndershme, duan zgjedhje me standarde si i gjithë populli shqiptar. Në qoftë se fiton vullneti i popullit, fitojmë të gjithë, edhe socialistë, edhe demokratë edhe qytetarët e Shqipërisë.
Çani: Këtu të gjithë janë dakord me këtë gjë. Edhe po të ishte Edi Rama këtu do të thoshte “po Koço edhe unë jam për zgjedhje të lira”.
Kokëdhima: Në qoftë se nuk fiton vullneti i popullit, edhe në qoftë se fiton Partia Socialiste, kemi humbur ne si socialistë, kanë humbur qytetarët dhe fitojnë 5 veta dhe një grusht biznesesh të lidhur me 5 persona që qeverisin dhe që përfitojnë nga këto manipulime. Po të marrim tezën tjetër të rëndësishme që është: “Cili është roli i popullit në këtë demokracinë e Shqipërisë?”. E kam thënë në shumë fjalime, popullin e kanë zhveshur nga të gjitha të drejtat e tij. Populli shqiptar është i vetmi popull në një demokraci kushtetuese që nuk ka të drejtë të votojë në referendume, nuk ka të drejtë të miratojë ligje me votë të drejtpërdrejtë, çështje, kauza, nuk ka të drejtë të zgjedhë asnjë përfaqësues. Nuk zgjedh dot populli në asnjë formë që bazohet te vullneti i tij i drejtpërdrejtë, as këshilltarët e bashkive, as kandidatët për deputetë, as kandidatët për kryetar bashkie, absolutisht as as kandidatët për president, as kandidatët për kryeministër. Të gjithë përfaqësuesit e popullit shqiptar i zgjedhin kryetarët e partive, ky është regjimi i partitokracisë. Tani le t’i pyesim socialistët në të gjithë Shqipërinë, ku të doni ju. Marrim e pyesim socialistët në Vlorë ose në Lezhë, ose në Kukës, ose në Shkodër, ose në Tiranë ose në Elbasan “si doni ju, që kandidatët për kryetar bashkia t’ua zgjedhë kryesia e Partisë Socialiste në Tiranë, apo t’i zgjedhë populli i Elbasanit? Si doni ju që këta kandidatë për kryetar bashkie t’i zgjedhë kryesia e Partisë Socialiste në Tiranë, apo t’i zgjedhë populli i Shkodrës për Shkodrën? Si do populli kudo, që deputetët t’ia çojë kryesia e partisë nga Tirana, t’i çojë edhe t’i thotë: Vër listën, ti shko e vetëm voto?”.
Çani: Deri tani populli nuk i ka refuzuar. Unë jam dakord më ty që duhet t’i zgjedhin ata.
Kokëdhima: Ne diskutojmë kush është problematika.
Çani: Ti e përmbys skemën, trekëndëshin me kokë lart, e kthen poshtë piramidën. Ti thua demokraci nga poshtë-lart, jo nga lart-poshtë.
Kokëdhima: Në qoftë se ka 26 vjet tranzicion të dështuar Shqipëria, a është e lumtur Shqipëria?
Çani: Është për shkak të kujt?
Kokëdhima: Është për shkak të faktit që një grusht njerëzish qeverisin Shqipërinë. 5 kryetarë partish dhe 3 ambasadorë qeverisin Shqipërinë. Nuk merr pjesë populli shqiptar në qeverisjen e vendit. Nuk merr pjesë elektorati i Shqipërisë në qeverisjen e vendit. Nuk ka rol populli në këtë demokraci.
Çani: A votojnë një herë në 4 vjet këta njerëz?
Kokëdhima: Votojnë thjesht partitë.
Çani: Po listat e partive?
Kokëdhima: As listat e partive. Ndërkohë që nuk ka një shembull në botë, një shembull të vetëm të një vendi në botë, ku populli nuk ushtron me votë të drejtpërdrejtë kompetencën e tij, aftësinë e tij, rolin e tij dhe nuk është i përfshirë në qeverisje, në pjesëmarrjen e tij në qeveri. Nuk bën pjesë në qeverisje.
Çani: Brenda prillit do të merret vesh se sa anëtar do të ketë lëvizja ZGJIDHJA. Deri me datën 25 prill ju merrni vesh sa anëtarë ka dhe pritet të keni rreth 30 mijë. Një Shqipëri e vogël duhet thënë për një lëvizje që është akoma brenda partisë.
Kokëdhima: Ne kemi objektiv që në fund të prillit të kemi 25 mijë anëtarë të lëvizjes sonë.
Çani: Kur ti ma shpjegove para se të hynim në emision se cili është thelbi i propozimit tënd për ta ndryshuar Shqipërinë dhe për ta futur Shqipërinë në rrugë të drejtë, mua mu duk tmerrësisht demokratike. U dëshpërova pastaj e thashë me vete “a është ky vend në gjendje të pranojë parimin tënd? Që është një parim në fakt që universal që e përdorin të gjitha vendet”. Ti e di çfarë propozon? Një gjë fare e thjeshtë: “Ti thua unë kam dëshirë të bëhem deputet, jo të propozoj deputet dhe kam të drejtën të aplikoj”. Dhe në momentin që unë fitoj votat në komunitetin tim, unë jam deputet, me apo pa pëlqimin e kryetarit të partisë. Kjo është fantastike kur e dëgjon, sepse kjo normalisht do t’i bëjë njerëzit të ëndërrojnë. Ndërkohë që do të thoni si është deri tani. Tani vendos kryetari i çdo partie. Thotë ai për shembull, në Vlorë dua z Koço, në Shkodër dua Çanin, në Elbasan dua Sofinë, apo jo? Ndërkohë që Koço thotë hajde ta përmbysim skemën. Që të shpëtojë ky vend, thotë Koço, duhet që partitë në vetvete të bëhen demokratike. Në qoftë se nuk ka parti demokratike, pra me zgjedhje të hapura e transparente, është e kotë të mendojmë e të flasim për Vetting-un thotë Koço. Këtu unë jam totalisht dakord me ty. Problemi është a do arrish ti vallë da bësh dominues këtë parim? A do të arrish ta dominosh skemën politike, ta përqafojnë sa më shumë njerëz?
Kokëdhima: Unë dhe ZGJIDHJA do të luajmë rol të rëndësishëm në politikën e Shqipërisë në 10 vitet e ardhshme.
Çani: Bravo. Këto zgjedhje le t’i quajmë të djegura Koço. Në këto zgjedhje ti nuk hyn.
Kokëdhima: Unë nuk thashë hyjmë apo nuk hyjmë në këto zgjedhje.
Çani: Unë dua ta di Koço se të kam në studio.
Kokëdhima: Shpjegimi im është shumë korrekt dhe koherent që kjo lëvizje ka lindur si korent në Partinë Socialiste. Lidershipi i Partisë Socialiste është përpjekur ta nxjerrë jashtë dhe ta shtypë këtë lëvizje. Mos të harrojmë se represioni që është ushtruar mbi aktivistët tanë, është i pashembullt dhe i paprecedentë.
Çani: Por duhet të keni prova për këtë.
Kokëdhima: I kam deklaruar në çdo lloj mitingu, gjithë njerëzit tanë që i kanë larguar nga puna. Lidershipi i Partisë Socialiste, kryeministri ynë, pushon njerëz të shkëlqyer, socialistë të shkëlqyer, vetëm për shkak të faktit se ata kanë bindjet e tyre politike, vetëm për shkak të bindjeve politike dhe kanë pikërisht pajtimin e tyre me këtë projekt për demokratizimin e Partisë Socialiste, për demokratizimin e partive politike dhe për demokratizimin e gjithe jetës së vendit.
Çani: Mos ndoshta po i bie në qafë më shumë Edi Ramës? Boll ka gjithë këto armiq, edhe ti i duhesh tani. Tani po e godet Lul Basha…
Kokëdhima: Ramës nuk i kërkoj asgjë që është e tij. Unë i kërkoj Ramës dhe Lul Bashës, të lëshojnë ato të drejta që janë të popullit, që këta i kanë marrë dhe i kanë uzurpuar, që nga Sali Berisha e deri aktualisht kryetari i ri i Partisë Demokratike, që ka detyrimin t’i kthejë popullit shqiptar, ashtu si Edi Rama ka detyrimin t’i kthejë shqiptarëve pushtetin që nuk është i tyre, por që është i qytetarëve të Shqipërisë. E thotë e drejta, nuk e them unë.
Çani: Në përgjithësi ti e di që ajo nuk jepet, ajo merret. Ti thua jepja. Si t’ia japim?
Kokëdhima: Padyshim që ne nuk do ju lutemi këtyre. Do t’ju imponohemi me forcë. Dhe do t’ju imponohemi me vullnetin e popullit.
Çani: Por në 10 vitet që vijnë.
Kokëdhima: Jo në 10 vitet që vijnë, në të 10 vitet që vijnë unë do të bëj një rol dhe një gjurmë të rëndësishme në politikën e Shqipërisë.
Çani: Ti je duke folur këtu për një njeri a thua se ti nuk e njeh. Ti atë njeri e njeh më mirë se të gjithë ne.
Kokëdhima: Do të më lejosh të tregoj strategjinë që do të ndjek për këtë punë.
Çani: Vetëm se do të shpjegosh një gjë, të lutem. Ti po flet e thua që do të imponojmë.
Kokëdhima: Do të fitojmë, nuk diskutohet kjo. Se janë të drejtat e popullit shqiptar. Sepse me këtë situatë shiko ku kemi ardhur. Çdo palë zgjedhje vetëm gënjehet populli. Në 2013-n ne i thamë popullit shqiptar që do të bëhet më i pasur, më pak i korruptuar dhe do të jetojë më mirë. Sot populli shqiptar është po aq i varfër sa ishte në vitin 2013. Është më i prapambeturi në rajon dhe Shqipëria është ndër më të korruptuarat në botë.
Çani: Kush i thotë këto?
Kokëdhima: Këto janë të vërtetat e jetës.
Çani: E nëse janë të vërteta, çfarë pastaj? Ku është problemi këtu?
Kokëdhima: Konkluzioni është shumë i thjeshtë që nuk funksionon. Por cila është arsyeja që ne prodhojmë vetëm zhgënjim në Shqipëri? 26 vjet tranzicion i dështuar dhe një zhgënjim i tillë për popullin, dhe një situatë e tillë kur nuk ju ofrohet asnjë shans për të realizuar ëndrrat e veta të rinjtë dhe të rejat e këtij vendi. Më thoni si zgjidhet kjo? Hiq një palë gënjeshtarë dhe hajde një palë gënjeshtare. Hiq një palë kusare dhe hajde një palë kusare. Ik ca të korruptuar dhe hajde ca të tjerë. Si zgjidhet kjo? Ma thoni juve. Në qoftë se nuk ju bind rruga ime, më thoni si zgjidhet kjo?
Çani: Unë këtu nuk do të bëj debat me ty, por bëj pyetje që të kuptoj. A nuk mendon se ti apo disa faktorë të tjerë në këtë vend, njerëz me eksperiencë apo jo, jeni duke folur para se të flasë populli? Populli është në shtëpi Koço. Unë ta kam thënë tezën time për popullin. Populli, të paktën deri në këto momente që po flasim, është në shtëpi për qejf. Çdo të shtunë dhe të diel ikin në Mullet dhe hanë mish të pjekur. Janë pa fund makina, bllokohet rruga.
Kokëdhima: Sikur të ishte e vërtetë për të gjithë populli kjo, do të ishte një e vërtetë shumë e bukur.
Çani: Në qoftë se e kam gabim ma hidh poshtë, të lutem.
Kokëdhima: Shkojnë edhe ata qindra mijëra njerëz që marrin nga 30 mijë asistencë, kështu bëjnë, siç thoni ju?
Çani: Po ku janë këta? Unë nuk i shoh. Ato janë, ato ekzistojnë. Unë po them ku janë, sepse të shoh ty të revoltuar, shoh Blushin të revoltuar, shoh Lul Bashën të revoltuar, por nuk shoh këta hallexhintë. Ku janë hallexhinjtë? Dhe përderisa nuk janë do të thotë se s’janë hallexhinj. Unë kështu e kuptoj. Nuk e di se sa i qartë jam. Pra përderisa ata nuk shfaqen, domethënë ata nuk janë hallexhinj, Koço.
Kokëdhima: Unë nuk jam i revoltuar. Ju doni të thoni se këtu njerëzit nuk luftojnë.
Çani: Jo, jo. Unë nuk dua të them këtë fare. Dua të them mos ndoshta jeni duke përgatitur ju, ose doni të përgatisni opinionin dhe të dominoni.
Kokëdhima: Ti kujton se ne i sajojmë të varfërit?
Çani: Jo. Biem dakord se të varfër ka me 30 mijë lekë në muaj asistencë.
Kokëdhima: Edhe korrupsionin e sajojmë? Edhe faktin që Shqipëria varfërohet çdo vit e që nuk pasurohet, e sajojmë. Edhe faktin që këtu nuk ka asnjë mundësi që rinia të jetojë e lumtur dhe të ndërtojë jetën e saj?
Çani: O Koço, nuk mohoj asgjë nga këto.
Kokëdhima: Po çfarë?
Çani: Po them thjesht, o vëlla, përderisa këta ekzistojnë dhe deri këtu biem dakord bashkë, ku janë? Pse nuk janë?
Kokëdhima: Ku duhet të jenë?
Çani: Duhet të jenë në rrugë, siç janë në Greqi kur kanë probleme. Siç janë në Serbi, siç janë në Mal të Zi, siç janë në Maqedoni. E keni parë kur njerëzit kanë probleme dalin? Këtu nuk dalin.
Kokëdhima: Ke shumë të drejtë. Tani e kuptova.
Çani: Prit një sekondë. Njerëzit e Edi Ramës e di çmë bëjnë mua me këtë, pasi më bien nga mëngjesi në darkë, më shajnë nga nëna, nga motra, sepse kujtojnë se unë po bëj kështu, thuaj, propagandë kundër tij. Gabohen. Unë jam duke bërë propagandë në favor të tij, por ndonjëherë budallenjtë nuk kuptojnë, është çudi e madhe. Dhe ideja është kjo, që kur unë them pse nuk janë në rrugë, nuk është se po bëj thirrje të dalin sepse kush jam unë që të bëj thirrje. Mua s’më dëgjon njeri fare. Unë jam një njeri kot që bëj një emision njëherë në javë. S’ka lidhje kjo gjë fare, fare. Nuk është në ambiciet e mia, sepse unë nuk jam me asnjërën palë, Koço. As me ata që protestojnë, as me ata që janë në pushtet, shyqyr Zotit. Pyetja ime është e thjeshtë, mo vëlla: Këta njerëz, kur them unë se nuk janë, sepse do i shikonim. Unë jam duke thënë këtë gjë që ndoshta këta njerëz jetojnë mirë në varfërinë e tyre. Janë të kënaqur, Koço. Nuk kanë asnjë shqetësim. Kaq jam duke thënë unë. Sepse një njeri që ka një shqetësim, Koço, del dhe bërtet mo vëlla, i bie tavolinës. Ku janë mo vella? Ore, vetëm kështu unë mund të arrij të bëj një analizë politike. Në momentin që më thua, Arjan këta janë dhe ne do t’i nxjerrim, atëherë kjo është histori tjetër. Por deri në këto momente ata nuk janë Koço. Dhe këtë ja kam thënë Blushit. Këtë ja kam thënë këtij Lul Bashës dhe prandaj sinqerisht unë po ta them, nuk po tallem. Sinqerisht them se Edi Rama deri në këto momente që po flasim është një lider normal i fuqishëm dhe ndaj tij nuk ka absolutisht asnjë pakënaqësi. Populli është në shtëpi. Kjo është analiza ime naive, Koço. Të lutem më thuaj ti cila është analiza jote? Ma thuaj, ma hidh poshtë. Jam shumë kurioz.
Kokëdhima: Sigurisht. Populli ynë është një popull i dekurajuar. Është një popull i lodhur. Ja kanë vrarë nervin. E kanë mashtruar dhe gënjyer pafund. E kanë shtypur, e kanë përbuzur, e kanë vjedhur dhe e kanë lënë pa aftësi për të reaguar. Sepse i kanë shkatërruar edhe të gjitha partitë politike, i kanë kapur këto parti politike, i kanë shkatërruar këto parti politkike. Ato nuk janë më parti politike. Kanë një hendek shumë të madh me bazën. Udhëheqja dhe baza kanë një hendek shumë të madh, ashtu si qeveria me popullin ka një hendek shumë të madh. Nuk e përfaqësojnë këto parti bazën e tyre dhe është kjo situatë sot që ju thoni ku janë njerëzit.
Çani: Unë them thjesht mos ndoshta nuk janë keq ata mo, dhe ndoshta ty apo njerëzve të tjerë ju duket si keq. Kjo është pyetja ime, se unë s’kam absolutisht asgjë. Unë jam i shkëputur nga palët totalisht.
Kokëdhima: Unë nuk kam patur njohje, sigurisht unë kam patur shumë njohje, por s’kam patur njohjet që krijova gjatë këtyre 3 viteve që isha deputet. E unë po them kaq, që vetëm në qarkun e Vlorës, që është relativisht një bregdet me më shumë shanse për të jetuar më mirë njerëzit, me më shumë mundësia, vetëm atje ne kishim të listuar në mbështetje 1 mijë familje që nuk kishin aftësi të shtronin një drekë ose një darkë për një festë në vit.
Çani: Po, edhe?
Kokëdhima: Përfshirë Vitin e Ri, përfshirë edhe festat e tjera.
Çani: Po, edhe?
Kokëdhima: Në këtë gjendje, në një mjerim ekstrem, në një mjerim të skajshëm. Po në të gjithë Shqipërinë? S’po futemi që të flasim për bukën këtu, duhet te flasim për gjitha kërkesat që ka jeta e njerëzve. Se njerëzit nuk jetojnë vetëm për një kafshatë bukë.
Çani: Të kuptoj. Unë jam shumë dakord. Po në Turqi e ke parë se si jetojnë njerëzit? Më fal Koço, në Turqi e ke parë sa vite jetojnë njerëzit në varfëri? E di çfarë bëhet në Turqi apo jo? Përtej resorteve luksoze, për shembull, sepse ato janë vërtetë luksoze dhe ja vlen të bësh pushime.
Kokëdhima: Si mund të flasim ne, Arian, më vjen shumë keq!.
Çani: Ça jemi ne?
Kokëdhima: Të lutem. Tani mund të flasim ne për zhvillimet e Turqisë dhe për ekonominë e Turqisë?! Krahasoni me këtë vendin tonë këtu dhe këtë situatën që kemi ne?
Çani: Po kur kemi qenë më mirë mo Koço?
Kokëdhima: Të lutem tani. Populli ynë i ka të gjitha mundësitë që të jetojë shumë mirë.
Çani: Tjetër gjë ajo, por s’kemi qenë më mirë.
Kokëdhima: Meriton të jetojë shumë mirë. Dhe çdo qytetar që vjen në jetë ka vetëm një jetë. Dhe ai ka të drejtë të patjetërsueshme, të pacenueshme që të jetojë ëndrrën e tij dhe ta realizojë ëndrrën e tij. Dhe që të bëjë një jetë shumë të mirë.
Çani: Po more zotëri.
Kokëdhima: Dhe këto shanse duhet t’ja japë Shqipëria.
Çani: Po, Koço.
Kokëdhima: Dhe duhet t’ia japë të gjithë Shqipërisë dhe të gjithë shqiptarëve të këtij vendi.
Çani: S’jemi kundër kësaj ne.
Kokëdhima: Janë kundër.
Çani: Kush?
Kokëdhima: Ata që s’ja japin.
Çani: Koço Kokëdhima, kënaqësi që jam me ty sonte në studio, pas 12 vitesh. Po flisnim për ZGJIDHJEN, por para se të më thoni se çfarë mendoni për aktualitetin politik në Shqipëri dhe a do ketë një dalje nga kjo situatë, kishit dy fjalë për të thënë, se nuk dua tua zë në grykë ato dy fjalët që po më thoshit, nga debati që sapo lamë para pauzës.
Kokëdhima: Në fakt Arian, unë e prita me shumë kënaqësi ftesën tuaj edhe për një interes pragmatist që të jem shumë i ndershëm me ju.
Çani: Ma thuaj.
Kokëdhima: Sepse emisioni juaj është shumë rinor dhe ka ndjekës shumë të rinj. Por ky është targeti kryesor edhe i ZGJIDHJES, në fakt.
Çani: Kujdes, na shohin edhe shumë pleq, ndërkohë dhe shumë kalamaj.
Kokëdhima: Po, po. Nuk përjashtohen se programi jonë kërkon reformimin e sistemit politik, kërkon në Shqipëri të sundojë shteti modern, të sundojë ligji, të sundojë drejtësia. Tani ne kemi edhe një përqendrim të madh për të zgjeruar radhët me të rinj e të reja dhe me qytetarë të tjerë.
Çani: Koço, që të mos vonohemi te këto, sepse këto jeni mjeshtër i paparë për të më thënë këto gjëra dhe nuk jam kundër unë. Problemi është, nuk ma dhatë përgjigjen, në këto zgjedhje do të hyni apo jo?
Kokëdhima: Tani ne kemi gjithashtu një aksion të rëndësishëm në duar, që është nisma ligjore. Ne e kemi quajtur “Unë zgjedh deputetin që dua”. Ne fakt është një projektligj. Projektligji është ligji që kërkon t’i japë fund situatës parapolitike të partive politike shqiptare. Këto parti nuk janë parti me standarde. Qeverisen si banda. Qeverisen si ndërmarrje private, por jo ndërrmarrje private që zbatojnë ligjin, por ndërmarrje private që nuk respektojnë ligje. Dhe duam që këto parti politike, me ligj të respektojnë standardet siç i kanë partitë poltike në gjithë vendet e civilizuara.
Çani: Koço si do ta çash këtë historinë me ligj? Si Koço? Kjo është e vështirë.
Kokëdhima: Këtë nismën ligjore që them unë, ne ja shpjegojmë çdo qytetari dhe do ta firmosim me të paktën 1 milion e gjysmë shqiptarë.
Çani: Një ndërhyrje për peticion?
Kokëdhima: Jemi duke bërë një nismë ligjore, kështu përkufizohet në termat juridikë kjo gjë.
Çani: E në qoftë se firmosin 1 milionë e gjysmë shqiptar, ç’ndodh?
Kokëdhima: E pastaj ne me vullnetin e mbështetjen e këtyre shqiptarëve, do të kërkojmë që ky ligj të imponohet për t’u bërë standard në Shqipëri.
Çani: Po si, pra?
Kokëdhima: Arian, të lutem.
Çani: Kjo është pyetja.
Kokëdhima: Tani, jemi duke folur për politikë dhe në politikë. Dhe si imponohet vullneti i popullit, kjo nuk është një çështje që mund ta them unë tani. Me çdo mjet demokratik, populli, kur ndërgjegjësohet dhe organizohet, mund ta imponojë vullnetin e e tij. Dhe unë jam i sigurt që Shqipëria do të ndahet nga ky tranzicion i pamerituar dhe i padëshiruar. Do të ndahet. Kjo histori do të marrë fund. Dhe ju do të pajtoheni me planin tonë. Edhe ju ka rrezik të anëtarësoheni te ZGJIDHJA. Edhe ju ka rrezik t’i bashkoheni kësaj lufte, siç presim dhe mirëpresim që shumë intelektualë të tjerë të Shqipërisë, të punojnë së bashku për të demokratizuar partitë politke, për t’i dhënë mundësi popullit…
Çani: Është mision i bukur, por më duket tmerrësisht i vështirë, Koço.
Kokëdhima: Dhe për t’i dhënë qytetarëve të drejtë t’i zgjedhin njerëzit qoftë kur janë në parti. S’ka kuptim që sot në 2020-n, njerëzit t’i emërojnë kryetarët e partive. Nuk zgjidhen në Partinë Socialiste njerëzit. I emëron kryetari të gjithë, pa përjashtim. Edhe deputetët, edhe funksionarët e lartë etj, etj. Partia e të punësuarve. Si funksionion kjo? Si qeveriset? Si mund të prodhojë një qeverisje demokratike një parti që nuk është demokratike në vetvete? S’mund të prodhojë. Dhe ne kemi nevojë që të demokratizojmë qeverisjen e vendit dhe t’i japim një drejtim ekonomisë. T’i japim një rrugë të re popullit tonë. Këtë do ta bëjmë të gjithë bashkë.
Çani: Si të gjithë?
Kokëdhima: ZGJIDHJA është një platformë thellësisht demokratike.
Çani: Duhet të votohesh, Koço. O Koço, duhet të dalësh në zgjedhje.
Kokëdhima: Sigurisht, do të votohemi. Padyshim që do të votohemi.
Çani: Unë po të pyes dhe ti s’ma thua. Nuk e di pse je kaq kokëfortë. Të them do të futesh në zgjedhjet e 18 qershorit, nëse do të bëhen zgjedhjet?
Kokëdhima: Ta shpjegoj, më dëgjo.
Çani: Jeni në minutazhin e fundit Shiko Koço, je në minutat e fundit.
Kokëdhima: Më lër ta shpjegoj tani. E kuptova, më lër të shpjegoj. Unë nuk e nisa fillimisht projektin për të bërë një parti politike.
Çani: E dimë.
Kokëdhima: Por nisa një lëvizje për të reformuar Partinë Socialiste.
Çani: Nuk funksionoi. Edi Rama tha është jashtë partisë, tani e dëgjuam këtë gjë.
Kokëdhima: Tani kjo lëvizje po shkon 20 e ca mijë veta, 20 e ca mijë anëtarë. Nuk është më Koço, kjo lëvizje. Kjo lëvizje është një gjë tjetër. Edi Rama bën gabim të rëndë që thotë nuk i konsideron këta njerëz.
Çani: Ai tha është jashtë Partisë Socialiste.
Kokëdhima: E di unë historinë e tij. Është gabim i rëndë që e përçan të majtën, e përçan dhe e zvogëlon Partinë Socialiste. Dhe këto janë përgjegjësi të tij dhe le t’i marrë ato përgjegjësi e t’i mbajë, për mua pak rëndësi ka. Unë i shkoj me urtësi. Në politikë nuk shkoj as me pozicionin e të fortit, as me të njeriut që e mendon se ka të drejtë kur ka pushtet. Jo, unë shkoj me arsyen, me logjiken dhe me interesin e qytetarëve. Me fakte dhe me interesin publik. Dhe shpjegoj se është gabim i madh të mohojmë debatin. Është gabim i madh të përjashtojmë gjithë këta njerëz, gjithë këto mijëra njerëz që e duan këtë lëvizje, t’i nxjerrim jashtë partisë. Por këtu nuk mbaron kjo lojë, e kjo histori nuk mbaron këtu. E kam shpjeguar edhe në fjalimin që kam mbajtur në Shkodër. Ne do zgjedhim me primare kandidatë për deputetë, individë që dëshriojnë të promovohen. Në 4 qarqe, në mënyrë të sigurtë, ne do t’i zhvillojmë këto primare sivjet, gjatë muajit prill në 4 qarqe. Në Tiranë, në Elbasan, në Fier dhe në Vlorë.
Çani: Primare mikse.
Kokëdhima: Sigurisht. Nëse do të mundemi të bëjmë, të zhvillohemi, të përgatitemi si duhet edhe në ndonjë nga qarqet e tjera të mëdha, ne mund të zgjerohemi dhe më tej. Ne primare mikse do të zhvillojmë edhe në Athinë, sepse edhe atje kemi një përqendrim shumë të madh mbështetësish. Këtë listë me kandidatë për deputetë, ne do t’ia propozojmë Partisë Socialiste për t’i miksuar.
Çani: Në ç’datë?
Kokëdhima: Brenda muajit prill, sigurisht. Unë e kam thënë, që ne kemi dy Parti Socialiste. Kemi atë partinë e bazës, të cilën e përfaqësoj unë më këto ide dhe me këto projekte. Këto janë dëshirat e socialistëve të bazës dhe qytetarëve të Shqipërisë. Janë nevojat e tyre. Kemi edhe këtë partinë e udhëheqjes pastaj, që e refuzon këtë partinë e bazës. Por është çështje e tyre.
Çani: Koço jam shumë i qartë. Në këtë 5 minutësh të fundit që kemi ngelur bashkë, nuk dua të të lodh, më thuaj të lutem, por këtu vërtetë duhet të jesh vërtet sintetik në maksimum, të lutem.
Kokëdhima: Po, më thoni.
Çani: Sipas teje, do të ketë zgjedhje më 18 qershor? Pra do të hynë palët në zgjedhje, nuk dua t’i bie gjatë.
Kokëdhima: Pa opozitën, nuk do të ketë zgjedhje.
Çani: Kjo është përgjigja jote?
Kokëdhima: Pa opozitën nuk shkohet në zgjedhje, shkohet në luftë. Nuk është e gatshme Shqipëria të shkojë në luftë, as për Edi Ramën dhe për asnjë njeri tjetër.
Çani: Ledio, Koço Kokëdhima: Pa opozitën nuk shkohet në zgjedhje. Të lutem hidhe te “Facebook”-u i emisionit, sepse duhet të jemi korrekt me njerëzit. Ilir Meta, Koço Kokëdhima, nga njohjet dhe ekperienca jote, sipas teje dhe nga ato që ti ke vënë re deri tani, nuk dua të bëj orakullin tani, do hyjë në një koalicion, pra do të vazhdojë koalicionin me Edi Ramën, apo do të hyjë më vete? Apo do të shkojë me PD-në, sado që të duket pa gjasa kjo e fundit që të ndodhë?
Kokëdhima: Ajo që mund të them tani është kjo që Ilir Meta dhe Lëvizja Socialiste për Integrim nuk mund të shkojnë në një koalicion në zgjedhje pa opozitën. Pa pjesëmarrjen e opozitës në zgjedhje.
Çani: Jemi dakord.
Kokëdhima: Kjo gjë është gjëja që mund të them unë sot.
Çani: Pra ti thua që Ilir Meta do të shohë se çfarë do të bëjë opozita?
Kokëdhima: LSI-ja nuk mund të shkojë dot në zgjedhje, për hir të faktit që është sot në koalicion me Partinë Socialiste, në qoftë se në këto zgjedhje nuk përfshihet opozita. Në qoftë se këto zgjedhje do të realizohen me pjesëmarrjen e shumicës dhe të opozitës, atëherë ne mund të flasim sesi mund të konfigurohen.
Çani: Koço, e qartë. Ti je për një qeveri teknike apo kundër qeverisë teknike që kërkon Lul Basha?
Kokëdhima: Shiko.
Çani: Ma thuaj shkurtimisht. E di që jemi në momentet e fundit, ashtu, por s’ka problem. Fjala jotë është shumë e rëndësishme.
Kokëdhima: Unë mendoj që Partia Socialiste nuk e meritonte të ishte në kërë pozitë që është sot. Nuk e meritonte.
Çani: I the arsyet. I the arsyet pak më parë.
Kokëdhima: Jo. Për dy arsye që lidhen me këtë çështje, me zgjedhjet. E para sepse Partia Socialiste duhet të udhëhiqte luftën për zgjedhje të lira në Shqipëri dhe ne e kemi kauzë këtë çështje, zgjedhjet e lira, dhe nuk mund t’ia dorëzojë PS­-ja kauzën për luftën e zgjedhjeve të lira PD­-së, e cila është partia që mbolli kulturën e vjedhjes dhe manipulimit të zgjedhjeve në Shqipëri. Kjo është e vërteta historike. Dhe fakti që qeveria jonë ia ka lëshuar këtë iniciativë Partisë Demokratike, është një vepër shumë e gabuar, e cila vjen nga dy arsye. Arsyeja e parë është që qeveria e Edi Ramës nuk bëri asnjë përpjekje për të pastruar zgjedhjet në Shqipëri. E majta nuk iu distancua kulturës së vjedhjes së zgjedhjeve që mbolli Berisha dhe Partia Demokratike në Shqipëri, por iu bashkua kësaj kulture. Të dy palët vjedhin, trafikojnë dhe manipulojnë.
Çani: Kujt i referohesh? Kujt palë zgjedhje i referoheni?
Kokëdhima: Të gjitha zgjedhjeve. Unë i njoh të gjitha palët e zgjedhjeve. Të dy palët, e majta dhe e djathta, vjedhin, trafikojnë dhe manipulojnë vota në Shqipëri.
Çani: E kam të qartë qëndrimin tënd Koço. Pyetja ime është a je për qeveri teknike, pra me kërkesën e Bashës apo jo? Apo duhet që Rama me qeverinë e Ramës të shkojë vetëm në zgjedhje?
Kokëdhima: Unë jam për këtë çështje. E para…
Çani: Nuk po më përgjigjeni direkt.
Kokëdhima: Të lutem tani. Më lër të të them se çfarë mendoj unë. Se unë nuk mund të them atë që doni ju.
Çani: Jo, jo.
Kokëdhima: Dhe ju duhet të më kuptoni.
Çani: Unë të kuptoj shumë mirë.
Kokëdhima: Pika e parë: Qeveria jonë kishte përgjegjësi të bënte reformën zgjedhore me themel.
Çani: E thamë këtë.
Kokëdhima: Jo nuk e kemi thënë. Në mënyhrë përfundimtare, pra ta bënte njëherë e përgjithmonë. Shqipëria ta mbyllë kapitullin e zgjedhjeve.
Çani: Po iku kjo, s’u bë Koço.
Kokëdhima: Kjo është pika e parë dhe këtë detyrë e ka edhe sot. Kjo është imperativi i parë që duhet të garantohet. Dhe së dyti: Partia Socialiste, shumica, duhet t’i japë besim opozitës, duhet të japë atë qeveri që garanton zgjedhje të lira dhe të ndershme. Duhet ta riformulojë qeverinë, shumica jonë.
Çani: Që do të thotë? Shkohet me Edi Ramën në zgjedhje, apo jo?
Kokëdhima: Nuk është me rëndësi kjo, shkon me Edi Ramën, s’shkon pa Edi Ramën. Duhet të shkojë me një qeveri të shumicës së majtë. Të shumicës së majtë, por që është serioze dhe garanton zgjedhje të lira e të ndershme në Shqipëri.
Çani: Më konkretisht, ç’do me thënë të shumicës së majtë?
Kokëdhima: Të shumicës së majtë, të koalicionit të majtë. Prandaj i kam kërkuar unë, mblidh kongresin e jashtëzakonshëm dhe analizo situatën me përgjegjësi të lartë, mos ju fshih të vërtetave. Merr përgjegjësi për situatat që janë zhvilluar dhe për qeverisjen e vendit. Merrni përgjegjësi edhe për ato historitë e korrupsionit, historitë e kanabisit dhe për të gjitha gjërat e tjera. Riformuloni një qeveri serioze me njerëzit dhe potencialet më të mira të së majtës, që ofron seriozisht qeverisjen e duhur për vendin dhe për zgjedhjet. Bëni reformën në konsensus të plotë me opozitën dhe shkoni e bëni zgjedhje të lira e të ndershme. Ato që deklarojnë këta që do të bëjmë zgjedhje pa opozitën etj, etj, me forcë e stërforcë, janë deklarata të papërgjegjshme kalamajsh dhe jo burrash shteti. Burrat e shtetit duhet të përballojnë të vërtetën siç është, sepse janë histori me përgjegjësi të rëndë për vendin.
Çani: Por çfarë të bëjë ky tani, o Koço?
Kokëdhima: Vihet në diskutim paqja e vendit. Vihet në diskutim stabiliteti i vendit, vihet në diskutim…
Çani: Pse?
Kokëdhima: Si pse?
Çani: Ai rri me vota në qeveri, nuk është se rri pa vota. Ai ka vota.
Kokëdhima: Nuk e kam fjalën për qeverinë.
Çani: Po për çfarë e ke?
Kokëdhima: E kam fjalën për zgjedhjet, zotëri.
Çani: Po pra, po.
Kokëdhima: Që më thua mua se do të bëjë zgjedhje pa opozitën. Nuk mund të bëjë dot zgjedhje pa opozitën.
Çani: Po çfarë të bëjë ky në qoftë se nuk hyn opozita, Koço?
Kokëdhima: Opozita ka për detyrë të shkojë në zgjedhje, të cilat janë zgjedhje të lira dhe të ndershme. Ka përgjegjësi të shkojë.
Çani: O Koço, edhe njëherë. Ky thotë që zgjedhje të lira e të ndershme do bëjmë, hajde të flasim çfarë doni ju, mjafton të jetë brenda standardeve të OSBE/ODHIR-it. Tani, këta i thonë ne me ty nuk hymë në zgjedhje.
Kokëdhima: Me këtë OSBE/ODHIR-in ka 100 mijë spekulime në të gjithë këto historira. Kemi 4 vjet qeverisje dhe qeveria jonë e di shumë mirë që në Shqipëri s’ka zgjedhje të lira e të ndershme. E di shumë mirë, siç e di unë dhe siç e dinë shumë të tjerë. Dhe ne kemi detyrën që t’i pastrojmë përfundimisht zgjedhjet.
Çani: More Koço, në vitin 2013 zgjedhjet ishin mirë!
Kokëdhima: Nuk e bëjmë pastrimin e zgjedhjeve për Partinë Demokratike, as për Lulzim Bashën, as për Sali Berishën. E bëjmë për popullin tonë se e kemi përgjegjësi. Është reforma e të gjithë reformave. Është mëma e të gjitha reformave. Nga pastrimi i zgjedhjeve fillon drejtësia, nuk fillon nga historitë e tjera. Mos të bëjnë këta sikur janë përgjëruar për drejtësinë. Nga zgjedhjet e lira e të ndershme burojnë të gjitha standardet e mira të shtetit. Dhe nga vjedhja e zgjedhjeve burojnë të gjithë këto fatkeqësitë e tjera, që s’po e lënë Shqipërinë të ngrenë kokë prej 26-vitesh.
Çani: More Koço, cilat zgjedhje? Zgjedhjet nuk janë bërë akoma? Nuk është e drejtë t’i paragjykoni Koço.
Kokëdhima: Nuk paragjykoj unë zgjedhjet.
Çani: Ti kështu thua.
Kokëdhima: Jo, unë nuk paragjykoj zgjedhjet. Është e sigurt që nuk mund të bëhen zgjedhje të lira e të ndershme në Shqipëri.
Çani: Pse?
Kokëdhima: Sepse nuk janë bërë asnjë palë zgjedhje të lira e të ndershme.
Çani: Po në 2013-n, vëlla?
Kokëdhima: As në vitin 2013 nuk janë zgjedhje të pastra. Janë zgjedhje të molepsura.
Çani: Si?
Kokëdhima: Po, të gjitha janë zgjedhje të molepsura.
Çani: Kush i fitoi ato zgjedhje?
Kokëdhima: Unë ju kam sjellë një shembull.
Çani: Po kush i fitoi ato zgjedhje mo? I fitoi Edi Rama me Ilir Metën!
Kokëdhima: Të lutem. Unë nuk po them që shumica jonë erdhi pa meritë në pushtet. Po flas për standardin e zgjedhjeve. Ju kam dhënë një shembull, ju dhashë një shembull në zonën time elektorale, e kam bërë në televizion këtë gjë.
Çani: Në Vlorë.
Kokëdhima: Në jug të vendit.
Çani: Mos, tmerr Koço, do ta mbyllim.
Kokëdhima: S’dëshiron të vazhdoj më?
Çani: Do ta mbyllim se mbaroi koha.
Kokëdhima: Më fal.
Çani: Jo mbylle idenë. Idenë do e mbyllësh, vetëm se do e mbyllim këtu.
Kokëdhima: Çdo palë zgjedhje ka trafikim vote, manipulim vote, pjesëërisht apo jo, s’ka rëndësi si. Zgjedhjet janë të shenjta, çdo votë është e shenjtë.
Çani: Jam dakord me ty, vëlla.
Kokëdhima: Dhe kur ti thua, ku është populli? Unë po them Arian se populli ose është duke ikur, ose është i strukur, sepse e kanë degjeneruar këtë popull. I kanë vjedhë votat, i kanë trafikuar votat, i kanë manipulu votat. I kanë hequr arsyen. E kanë bërë të parëndësishëm individin në këtë vend. E kanë bërë të parëndësishëm anëtarin e Partisë Socialsite. E kanë bërë të parëndësishëm qytetarin, votuesin.
Çani: Po s’e kanë bërë me zor, o Koço. Ata kanë marrë lekët. I kanë dhënë me zor lekët?
Kokëdhima: Pikërisht. Përmes këtyre veprimeve, përmes këryre standardeve të munguara, përmes zgjedhjeve të munguara në vend të lira e të ndershme dhe ne duhet t’i vendosim këto gjëra.
Çani: Koço, kur do të shihemi prapë? Unë e di që biseda me ty është shumë pasionante dhe nuk mbaron me kaq. Jo, do të të lë të qetë sot. Kur do shihemi prapë?
Kokëdhima: Kur të dëshironi ju.
Çani: Vetëm se po ikën nga kjo studio, po më lë një mister të madh. S’po më thua, do hysh do të kandidosh në këto zgjedhje, apo jo? Kaq gjë duhet të ma thuash si përgjigje.
Kokëdhima: Deri përpara pak kohësh unë isha një iniciator për të ndërtuar dhe zhvilluar një lëvizje politike dhe isha një idivid që flisja, sigurisht me një grup shokësh. Ndërsa tani drejtoj një lëvizje ku janë mijëra anëtarë, të cilët janë anëtarë të rëndësishëm. Secili prej tyre është një personazh me shumë rëndësi. Ka diçka të rëndësishme për të thënë për çdo gjë. Dhe unë nuk mund të them më dot gjëra vetëm. Tani vendimet merren nga e gjithë kjo organizatë.
Çani: Nuk e the akoma, do hysh apo jo në zgjedhje?
Kokëdhima: Nuk e vendos unë, do ta vendosin ata.
Çani: Ka një afat Komisioni Qendror, duhet të regjistrohesh në një moment të caktuar, Koço, apo jo?
Kokëdhima: Shiko, çështja ime nuk është as deputeti, as pushteti.
Çani: Jo, është puna të imponosh bindjet e tua. Ky është problemi, edhe i parimeve të tua. S’është puna e pushtetit.
Kokëdhima: Kauza dhe projekti im politik, mbaje mend po ta them me përgjegjësi këtu, do të fitojë në mënyrë të sigurt brenda shumë pak kohësh. Më beso për këtë gjë.
Çani: Ishte Koço Kokëdhima, zonja dhe zotërinj. Do të ritakohemi prapë, shumë shpejt.
0